ԵՐԵՎԱՆ, 6 դեկտեմբերի — Sputnik. Ռյազանից Իրինա և Սեմյոն Մայինսկիները ամուսնացել են Հայաստանում «Ժաննա, ամուսնացրո՛ւ» ծրագրի շրջանակում։ Հայկական ավանդույթներով նրանց հարսանիքը ցուցադրվել է դեկտեմբերի 3-ին «Պյատնիցա» հեռուստաալիքով, հայտնել է «Ռյազանյան հորոսկոպ» կայքը։
«Ժաննա, ամուսնացրո՛ւ» շոուն օգնում է սիրահարներին՝ կազմակերպել իրենց երազանքի հարսանիքը։
Զույգը կարող է ընտրել ցանկացած քաղաք, որտեղ տեղի է ունենալու հարսանիքը, իսկ Ժաննան օգնում է կազմակերպել այն տեղի ավանդույթներին համապատասխան։
Հարսանիքի բոլոր ծախսերն իրենց վրա են վերցնում շոուի կազմակերպիչները։ Դրա փոխարեն հարսն ու փեսան պետք է որոշակի առաջադրանքներ կատարեն, որոնք նրանց տալիս է Ժաննա Բադոևան։ Ռյազանցիները ծրագրում պատմել են, որ արդեն 7 տարի ամուսնացած են, բայց հարսանիք չեն արել։
Նորապսակները հագել են հայկական տարազ, աղջիկը հարսանեկան խնջույքի համար ընտրել է հայկական խոհանոցով ռեստորան, իսկ նրա ամուսինը զբաղվել է ամուսնական մատանիներ որոնելով։
Պսակադրությունից հետո նորապսակներին սպասվում էր տոնական խնջույք։ Ծրագրի վերջում ռայազանցիները, որպես նվեր, ռոք են երգել։
