ԵՐԵՎԱՆ, 21 նոյեմբերի- Sputnik, Գոռ Մարգարյան. Այս շաբաթվա ամենակարևոր նորությունների ցանկում տեղ են գտել հայ մասնագետները, ռոբոտները, տեսազանգերը, սմարթֆոններն ու Apple-ը։
Մերոնց ձեռքբերումները
Անցած շաբաթվա լուրերի հնգյակի առաջին հորիզոնականում հպարտություն առաջացնող նորություն է: Հայ տղերքի CodeFights ստարթափը, որը տեղակայված է Սիլիկոնային հովտում, հարթակն ընդարձակելու համար 10 մլն դոլարի ֆինանսավորում է ստացել: Այս ստարթափի նպատակն է օնլայն մենամարտերի միջոցով բացահայտել լավագույն ծրագրավորողներին և նրանց համար աշխատանք գտնել:
Ստարթափը կոտրում է բոլոր այն կարծրատիպերը, թե լավ ծրագրավորող լինելու համար անհրաժեշտ է ունենալ Սթենֆորդի կամ էլ Մասաչուսեթսի Տեխնոլոգիական ինստիտուտի դիպլոմ. այժմ բավական է լինել խելացի, աշխատասեր և նպատակասլաց, ու կարող ես CodeFights-ի միջոցով ամենալավ աշխատանքը գտնել ՏՏ ոլորտում:
CodeFights-ում կարելի է բացել անձնական էջ և ծրագրավորման մրցումներ կազմակերպել քեզ պես սկսնակների, ինչպես նաև ընկերության ստեղծած բոտերի հետ:
Ստարթափն իր եկամուտները կստանա աշխատանքի գործակալության պարզունակ մեխանիզմով՝ գործի տեղավորված յուրաքանչյուր ծրագրավորող ընկերությանը կվճարի իր մեկ տարվա աշխատավարձի 15 տոկոսը:
Ռոբոտները վտանգավոր են դառնում
Ֆիլմերում ներկայացվող տեսարանները, որոնցում ռոբոտները հարձակվում են իրենց ստեղծողների կամ իրենց տեսակի վրա, արդեն իրականություն է դառնում:
Չինական Շենչժեն քաղաքում կայացած China Hi-Tech Fair ցուցահանդեսի ժամանակ ռոբոտը վնասել է մի տղամարդու:
4-12 տարեկան երեխաների ուսուցիչ-ռոբոտի աշխատանքում խափանում է տեղի ունեցել, և ռոբոտը կոտրել է ապակե ստենդը, «հարձակվել» ցուցահանդեսի այցելուի վրա: Տղամարդը ոտքի վնասվածքով տեղափոխվել է հիվանդանոց:
Այժմ բժիշկները փորձում են բուժել տղամարդու վերջույթը, իսկ ծրագրավորողներն ուսումնասիրում են մեղավոր ռոբոտի «ուղեղը»: Լրագրողներն ըմբոստ ռոբոտին արդեն Spartakus են անվանակոչել: Կասկածում եմ, որ չինացիները հռոմեացիների օրինակով կխաչեն խեղճ Սպարտակին, բայց որ ռոբոտների հեղափոխության օրն արդեն մոտ է, գրեթե կասկած չի հարուցում։
Պաշտպանված տեսազանգերի խոստում
Շատերն էին դժգոհում (այդ թվում` նաև ես), որ WhatsApp հավելվածը տեսազանգ կատարելու հնարավորություն չունի: Սակայն վերջերս Ցուկերբերգի կողմից գնված հավելվածի մասնագետները խոսք են տվել ավելացնել այդպիսի հնարավորություն: Նրանք երաշխավորում են, որ տեսազանգերը լինելու են լիովին պաշտպանված և դրանց բովանդակությունը փակ է մնալու ինչպես WhatsApp-ի աշխատակիցների, այնպես էլ կառավարական կառույցների համար:
Այս խոստմանը մի քիչ դժվար է հավատալ, բայց հիշենք, որ տեսազանգերի ամենահայտնի ծրագիրը՝ skype-ը, բացահայտ հայտարարել է, որ ինչ-որ տեղ, ինչ- որ մարդիկ մեզ հետևում ու լսում են: Այստեղ տեղին է հիշել Ջորջ Օուրելի 1984 վեպը: Հիշու՞մ եք՝ «մեծ եղբայրը հետևում է ձեզ»: Ինչևէ, հուսանք, որ այս դեպքում մենք մեծ եղբոր միայն մեկ աչքի տեսադաշտում ենք լինելու:
Գովելի է նաև, որ WhatsApp-ում կկիրառեն տեսախցիկների և մարտկոցների արտադրության մեջ կիրառվող տեխնիկական վերջին նորույթները, ինչի արդյունքում այն անխափան կգործի նաև էժան սմարթֆոններում:
Հիվանդությունը որոշելու են սմարթֆոնի վրայի մանրէներով
Չէի ցանկանա զզվանք առաջացնել ընթերցողների մոտ, սակայն փաստ է, որ սմարթֆոնի վրա ավելի շատ մանրէներ կան, քան հասարակական զուգարանում:
Բայց կարևոր մի հանգամանք կա` այս փաստը օգտագործելով կազատվենք անալիզներ հանձնելու տհաճ գործընթացից: Շատ շուտով սմարթֆոնի մակերևույթից հավաքած մանրէների միջոցով հնարավոր կլինի պարզել սարքի տիրոջ հիվանդությունները: Այս մասին հայտարարել են Սան Դիեգոյի համալսարանի մասնագետները:
Նրանք վստահեցնում են, որ կկարողանան պարզել սմարթֆոնի տիրոջ սեռը, օգտագործած կոսմետիկան, մազերի վիճակը, նախընտրած ըմպելիքները, սնունդը, հիվանդությունները և կազմել հոգեբանական դիմանկարը: Հետազոտողները հույս ունեն, որ շուտով իրենց կատարած աշխատանքի արդյունքը կօգտագործվի քրեագիտության ոլորտում և օրինապահ մարմիններն էլ կկարողանան սմարթֆոնն օգտագործել հանցագործությունները բացահայտելու համար: Այնպես որ շուտով մատնահետքերը թաքցնելու համար ձեռնոց հագնելը բավարար չի լինի հանցագործների համար և նրանք պետք է նոր հնարքներ մտածեն:
Apple-ն ալբոմ է վաճառում
Apple ընկերությունը 1998-ից 2015 թվականների ընթացքում արտադրած իր գաջեթների 450 լուսանկարները հավաքել է մեկ ալբոմում և վաճառքի է հանել: Լուսանկարների հեղինակ Էնդրյու Ցուկերմանը վստահեցնում է, որ դրանք շատ համեստ ոճով են ներկայացված, իսկ Apple-ի դիզայնի հարցերով տնօրեն Ջոնաթան Այվի խոսքով` ալբոմը կարող է ուղեցույց դառնալ դիզայն ուսումնասիրող ուսանողների համար։
Հետաքրքիրն այն է, որ թվային տեխնոլոգիաների դրոշակակիր Apple-ն ալբոմը թողարկել է միայն տպագիր տարբերակով: Դրա որակի մասին պետք է առանձին խոսել: Այն տպագրվել է հատուկ պատրաստված թղթի և յուրօրինակ գույնով թղթի վրա: Տեքստը և լուսանկարները բարձր հստակության ներկով են տպվել, և ութակի գունաբաժանում է արվել: Եթե տպագրական այս նրբություններից ոչինչ չհասկացաք, ասեմ որ սա Apple-ի իմիջին արժանի ալբոմ է: Նախաձեռնությունը նվիրված է Սթիվ Ջոբսի հիշատակին: Վստահ եմ, որ նույնիսկ մահացած Ջոբսը Apple-ին մեծ եկամուտներ կբերի մանավանդ, որ ալբոմը կվաճառվի 300 դոլարով: Ավելի փոքր չափսը կարժենա 200 դոլար:
