Քաղաքապետարանի աշխատակազմի առողջապահության վարչության պետ Կամսար Բաբինյանը թեմայի վերաբերյալ մանրամասներ է ներկայացնում Sputnik Արմենիայի եթերում։
Բաբինյանի խոսքով` քաղաքապետարանը կապիտալ ծախսերը վերցնում է իր վրա` ջեռուցում, պատուհանների փոխարինում և առաստաղների վերանորոգում։ Կան հիմնարկներ, որոնք դեռ չեն նորոգվել, սակայն հարկ է նշել, որ քաղաքապետարանի ծրագիրն ուղղված է նաև պոլիկլինիկաների բուժսարքավորումների արդիականացմանը, ինչն էապես բարելավել է պոլիկլինիկաների աշխատանքի որակը։
«Որակից բացի, բուժսարքավորումների արդիականացումը նաև վճարովի ծառայությունների է հանգեցրել։ Այսօր մենք ունենք վճարովի ծառայությունների 74 տոկոս աճ։ Հաճախումների թիվը նույնպես ավելացել է, ինչը նշանակում է, որ ինչ-որ բան տեղից շարժվել է։ Քաղաքացին սկսել է վստահել պոլիկլինիկաներին»,- ասաց Բաբինյանը։
Ըստ նրա` առաջնային օղակի բուժհաստատությունները վճարովի ծառայությունների հաշվին կարողացել են շոշափելի գումար կուտակել և այն հատկացնել ընթացիկ նորոգման աշխատանքներին։
«20 տարվա խնդիրը 2 կամ 3 տարվա մեջ հնարավոր չէր լուծել։ Խնդիրները կփորձենք լուծել կամաց-կամաց»,- ասաց Բաբինյանը։
