ԵՐԵՎԱՆ, 4 դեկտեմբերի — Sputnik. «Եվրատեսիլի» կազմկոմիտեն «Եվրատեսիլ-2017» մրցույթի անցկացման հավանական վայր է դիտարկում Մոսկվան: Այս մասին հայտնում է գերմանական Bild պարբերականը` հղում անելով կազմկոմիտեի աղբյուրին: Եվրոպական հեռարձակման միությունը այլընտրանքային վայր է փնտրում, քանի որ Ուկրաինան ֆինանսական խնդիրներ ունի:
Պարբերականի տվյալների համաձայն` մրցույթի անցկացման վայրը փոխելու որոշումը ծագել է այն պատճառով, որ Կիևը դեռ որևէ երաշխիք չի ներկայացրել «Եվրատեսիլի» անցկացման վերաբերյալ: Ընդ որում՝ Կիևի այլընտրանք է դիտարկվում Մոսկվան:
Փորձագետները հաշվել են, որ մրցույթը կազմակերպելու համար առնվազն 25 մլն եվրո է պետք, իսկ Կիևն այդքան բյուջե չունի: Այդ պատճառով Եվրոպական հեռարձակման միությունը Կիևին սպառնացել է զրկել մրցույթն անցկացնելու իրավունքից, թեև 2016 թվականի «Եվրատեսիլում» առաջին տեղը գրավել էր ուկրաինացի երգչուհի Ջամալան:
Երկրորդ տեղը զբաղեցրել էր Ավստրալիայի ներկայացուցիչ Դեմի Իմը, իսկ երրորդը` ռուս երգիչ Սերգեյ Լազարևը: Մրցույթի անցկացման վերաբերյալ վերջնական որոշումը կընդունվի Եվրոպական հեռարձակման միության գլխավոր վեհաժողովի ժամանակ` դեկտեմբերի 8-ին:
