ԵՐԵՎԱՆ, 4 դեկտեմբերի — Sputnik. «ԿինոՊոիսկ» կայքում «Երկրաշարժ» ֆիլմը գրոհի է ենթարկվել, Facebook-ի իր էջում գրել է ֆիլմի ռեժիսոր Սարիկ Անդրեասյանը:
Ըստ նրա` մի քանի ժամվա ընթացքում ֆիլմի գնահատականը հասել է 6 միավորի, ինչն այդ կայքի համար ցածր ցուցանիշ է: Ֆիլմի գնահատականը բարձր է համարվում, եթե հանդիսատեսը 8-10 միավոր է գնահատում այն (խմբ):
«Picabu.ru կայքում գրոհ են հայտարարել Անդրեասյանի վրա: Սա արդեն տասը տարվա պատմություն ունի, և «ԿինոՊոիսկը» մեծ հաճույքով հաշվի է առնում ֆլեշմոբի արդյունքները: Ինձ թվում է՝ այդ ֆիլմը նման գնահատականի արժանի չէ: Խնդրում եմ տարածել գրածս և օգնել ինձ այս հարցում: «ԿինոՊոիսկին» խնդրում եմ գոնե մեկ անգամ օգնել»,- գրել է Անդրեասյանը:
Նրա խոսքով՝ ցանկալի կլիներ, որ կայքն «ազնվորեն ներկայացներ ֆիլմի գնահատականը և չխրախուսեր նման խնդիրներ առաջացնող մյուս ռեսուրսների չարագործներին»:
Անդրեասյանը նշել է նաև, որ կուզենար իմանալ, թե ով է այս «ֆլեշմոբի» հեղինակը, և ինչպես կարելի է պայքարել դրա դեմ:
«Խնդրում եմ տարածել սա և արդարություն եմ խնդրում: Հենց նոր «ԿինոՊոիսկը» մեզ հետ կապ հաստատեց և խոստացավ պարզել իրավիճակը, բայց ես արդեն մի քանի տարի է՝ այդօրինակ խոստումներ եմ լսում: Տեսնենք՝ ինչ կլինի»,- գրել է ռեժիսորը:
Sputnik Արմենիայի խնդրանքով` տեղեկատվական անվտանգության փորձագետ Սամվել Մարտիրոսյանը մեկնաբանեց իրավիճակը:
«Ակնհայտ է, որ այստեղ «դավեր են հյուսվում», բայց հասկանալու համար, թե ով է հեղինակը, պետք է ստուգել բոլոր «յուզերներին», իսկ նրանց թիվը հազարների է հասնում», — ասաց Մարտիրոսյանը:
Պատասխանելով այն հարցին, թե կարո՞ղ է արդյոք սա հարևան երկրի «բարեկամների» ձեռքի գործը լինել, թե՞ պարզապես մրցակիցներն են նման կերպ փորձում նվազեցնել ֆիլմի վարկանիշը՝ փորձագետը պատասխանեց՝ բոլոր տարբերակներն էլ հնարավոր են:
Ներկա պահին ֆիլմի վարկանիշը 7,239-ն է: Նույնիսկ անզեն աչքով կարելի է տեսնել, որ ֆիլմը գնահատողների շարքում կեղծ օգտատերեր կան:
