ԵՐԵՎԱՆ, 29 նոյեմբերի — Sputnik. Սուր շնչառական վարակներն առավել հաճախ բնորոշ են երեխաներին, քանի որ նրանց իմունիտետն ավելի թույլ է, քան մեծերինը։ Սակայն մեծահասակների դեպքում վարակները կարող են ավելի ծանր ընթացք ունենալ, որովհետև նրանք ունենում են խրոնիկ ուղեկցող հիվանդություններ։ Այդ մասին Sputnik Արմենիային ասաց ՀՀ առողջապահության նախարարության Հիվանդությունների վերահսկման և կանխարգելման կենտրոն ՊՈԱԿ-ի գլխավոր տնօրենի տեղակալ Լիլիթ Ավետիսյանը։
Ինչ վերաբերում է գրիպին, ապա դեպքերի մոտ 80 տոկոսն արձանագրվում է 0-18 տարեկանների մոտ, նշեց նա։
«Հատկապես դա վերաբերում է փոքր տարիքի երեխաներին։ Դա նորմա է։ Մենք հիմա էլ ենք սպասում, որ կարող է համաճարակ սկսվել։ Երբ եղանակը ցրտում է, մարդիկ մրսում և հիվանդանում են, այդ պատճառով աճում են գրիպով հիվանդանալու դեպքերը։ Այդպես լինում է ամեն սեզոն։ Կախված հարուցիչից` վիրուսը կարող է մնալ մարդու օրգանիզմում կամ տարածվել։ Հարուցիչից է կախված, թե ինչ ընթացք կունենա հիվանդությունը»,- ասաց Ավետիսյանը։
Նա ավելացրեց, որ հայ բժիշկները ֆիքսում են ՍՇՎ աճը։ Սուր ռեսպերատոր վարակների ցուցանիշների աճի պատճառով էլ առողջապահության նախարարությունը կիրառում է կանխարգելման մեխանիզմ, որը կոչվում է «համաճարակաբանական ֆիլտր»։
Ավետիսյանի խոսքով` առավոտյան դպրոց-մանկապարտեզներում բոլոր երեխաներին և ուսուցչական կազմին դիմավորում են բուժաշխատողները և հայտնաբերելով սուր շնչառական վարակներին բնորոշ ախտանշաններ ունեցողներին` մեկուսացնում են նրանց։
«Եթե երեխան հիվանդ է, բուժաշխատողը տեղյակ է պահում նրա ծնողներին, իսկ եթե վիրուս է հայտնաբերվել կրթական հաստատության աշխատակիցների մոտ, ապա նրանց տուն են ուղարկում։ Երևանում դա պարտադիր է, որովհետև այստեղ շատ երեխաներ են ապրում, հետևաբար` շատ սովորողներ կան։ Այդ կապակցությամբ վիրուսի տարածման վտանգը մեծ է»,- ասաց նա։
Մասնագետի խոսքով` համաճարակաբանական ֆիլտրի կիրառման արդյունքում հիվանդ երեխաների թիվը հետզհետե նվազում է։
«Մանկապարտեզների, դպրոցների աշխատողները և երեխաների ծնողները պետք է գիտակցեն, որ չի կարելի երեխային տանել այնտեղ, եթե նա հիվանդ է»,- հավելեց Ավետիսյանը։ Մասնագետը նաև նշեց, որ ավելի լավ է նման երեխաներին մեկուսացնել, եթե կա հիվանդության տարածման վտանգ, օրինակ, ՍՇՎ-ի կամ ջրծաղիկի։
