ԵՐԵՎԱՆ, 26 նոյեմբերի — Sputnik. Նելլի Դանիելյան. ՀՀԿ խոսնակ Էդուարդ Շարմազանովը երեկ երեկոյան հայտարարեց, որ իշխող կուսակցության համագումարի ժամանակ սյուրպրիզներ չեն լինելու: Եվ դա, թերևս, տրամաբանական է, քանի որ սյուրպրիզներն արդեն եղան համագումարից առաջ:
Օրինակ՝ պարզվեց, որ Հայաստանում դեռ 7 000 անկուսակցական էր մնացել, որոնք հենց լսեցին, որ վարչապետ Կարեն Կարապետյանը ՀՀԿ-ին անդամակցելու դիմում է գրել, շտապեցին մի դիմում էլ իրենք գրել:
Վարչապետի վարակիչ օրինակին հետևեցին նաև անկուսակցական 4 նորանշանակ նախարարները՝ տնտեսական զարգացման և ներդրումների նախարար Սուրեն Կարայանը, առողջապահության նախարար Լևոն Ալթունյանը, տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը և գյուղատնտեսության նախարար Իգնատի Առաքելյանը:
Համատարած հանրապետականացումը վերջին 2 օրերին այնքան թափ հավաքեց, որ թվում էր, թե գործադրի ՀՅԴ-ական 3 անդամներն էլ ուր որ է՝ դիմում կգրեն: Բայց, ինչպես երևում է՝ զսպեցին իրենց ոգևորությունը:
Այս ամենից հետո կարող է անհավանական թվալ, բայց բացի ՀՅԴ անդամ նախարարներից, կառավարությունում, պարզվում է, դեռ էլի են մնացել մարդիկ, որ առայժմ դիմում չեն գրել և մնացել են անկուսակցական:
Դրանք են՝ ԱԻ նախարար Արմեն Երիցյանը, էներգետիկ ենթակառուցվածքների և բնական պաշարների նախարար Աշոտ Մանուկյանը, մշակույթի նախարար Արմեն Ամիրյանը, արտաքին գործերի նախարար Էդվարդ Նալբանդյանն ու սպորտի և երիտասարդության հարցերի նախարար Հրաչյա Ռոստոմյանը, որն, ի դեպ, նախկինում ԲՀԿ անդամ էր, բայց անորոշ ժամանակով կասեցրեց իր անդամակցությունը հարազատ կուսակցությանը՝ հանուն նախարարի աթոռի:
Այս նախարարները, թերևս, որոշել են ապրիլին դիմում գրել, կամ միանգամից հրաժարականի դիմում են գրելու, քանի որ խորհրդարանական կառավարման անցնելուց հետո կայլևս անկուսակցականներ չեն լինելու:
Այսպիսով, ՀՀԿ-ն այսօր պաշտոնապես 154 000 անդամ ունի: ՀՀ բնակչության յուրաքանչյուր 18-րդը հանրապետական կուսակցության անդամ է: Բայց մինչև ապրիլ դեռ ժամանակ կա՝ լավ կյանքի ակնկալիքով նոր դիմումներ գրելու:
