ԵՐԵՎԱՆ, 26 նոյեմբերի — Sputnik. Ազատության կղզու առաջնորդ Ռաուլ Կաստրոն հաղորդել է, որ Կուբայի հեղափոխության առաջնորդ Ֆիդել Կաստրոյի դիակիզումը տեղի կունենա շաբաթ օրը, հաղորդում է Ֆրանս Պրես գործակալությունը:
90 տարեկանում կյանքից հեռացել է Կուբայի նախկին առաջնորդ, պետական, քաղաքական գործիչ, հեղափոխական Ֆիդել Կաստրոն:
Նրա մահվան լուրը պետական հեռուստատեսությամբ հայտնել է Ռաուլ Կաստրոն:
«Ֆիդել Կաստրոյի ցանկությամբ նրա մարմինը կայրվի շաբաթ օրը վաղ առավոտյան», — Ռաուլ Կաստրոյի խոսքերը հաղորդում է գործակալությունը:
Ֆիդել Կաստրոն ծնվել է 1926թ-ի օգոստոսի 13-ին Օրիենտե նահանգի Բիրան գյուղում։
1950թ-ին ավարտել է Հավանայի համալսարանի իրավաբանական ֆակուլտետը, այնուհետև՝ ասպիրանտուրան։ 1950-ական թվականների սկզբներին մտել է Կուբայի ժողովրդական («Օրթոդոքսների») կուսակցության մեջ։
1952 թվականի մարտի ռեակցիոն պետական հեղաշրջումից հետո հաստատված բռնապետության դեմ պայքարի ընթացքում «Օրթոդոքսների» կուսակցությունը աստիճանաբար քայքայվել է։ Սակայն Ֆիդել Կաստրոյին հաջողվել է փոքրիկ խմբում միավորել կուսակցության նախկին անդամներին և շարունակել պայքարը գեներալ Բատիստայի բռնապետության դեմ։
1953 թվականի հուլիսի 26-ին խումբը Սանտյագո դե Կուբայում հարձակում է գործել Մոնկադա զորանոցների վրա։ Ելույթը դաժանորեն ճնշվել է։ Ֆիդել Կաստրոն դատապարտվել է 15 տարվա բանտարկության, սակայն 1955 թվականին համաներումով ազատվել է և տարագրվել Մեքսիկա։
1956 թվականին հեղափոխականների խմբով ափ է ելել Օրիենտե նահանգում։ Խումբն աստիճանաբար վերածվել է ապստամբական բանակի և պարտիզանական պայքար ծավալել դիկտատորական վարչակարգի դեմ։ Հեղափոխության հաղթանակից հետո Կաբայում իշխանության գլուխ են անցել դեմոկրատական ուժերը։
Հեղափոխության հաղթանակից և Բատիստայի բռնապետության տապալումից հետո՝ 1959 թ.-ի հունվարի 1-ին, Կաստրոն իր վրա է վերցրել կուբայական բանակի հրամանատարությունը, իսկ 1959 թ.-ի փետրվարին զբաղեցրել կառավարության ղեկավարի պաշտոնը:
2008 թ.-ի փետրվարին Կաստրոն հայտարարել է, որ հրաժարվում է Կուբայի ղեկավարի պաշտոնից։
2016 թ.-ի փետրվարի 14-ին նա հանդիպել է Մոսկվայի և համայն Ռուսիո պատրիարք Կիրիլի հետ, որն այցելել էր Կուբա: 2016 թ.-ի ապրիլին Կաստրոն ելույթ է ունեցել Կուբայի Կոմունիստական կուսակցության 7-րդ համագումարում:
Ֆիդել Կաստրոն Մոսկվայի պետական համալսարանի պատվավոր դոկտոր է, «ժողովուրդների միջև խաղաղությունն ամրապնդելու համար» միջազգային լենինյան մրցանակի դափնեկիր (1961), Մովետական Միության հերոս (1963)։ Պարգևատրվել է Լենինի շքանշանով (1972)։
Կառավարման տարիներին Ֆիդել Կաստրոյի դեմ կազմակերպվել է ավելի քան 600 մահափորձ: Դրանց հետևում կանգնած են եղել ինչպես ամերիկյան կառավարությունը, այնպես էլ Կուբայում Կաստրոյի հակառակարոդները և ամերիկյան հանցավոր խմբավորումները:
