ԵՐԵՎԱՆ, 25 նոյեմբերի — Sputnik. 2017թ-ի հունվարի 1-ից ՀՀ շարքային սպառողների համար գազի 1 խմ-ի արժեքը կնվազի 7 դրամով` ներկա 146 դրամից դառնալով 139 դրամ: Նման որոշում ուրբաթ կայացրեց ՀՀ հանրային ծառայությունները կարգավորող հանձնաժողովը` հաստատելով «Գազպրոմ Արմենիա» ՓԲԸ ներկայացրած առաջարկը:
Որոշման համաձայն` ամսական մինչև 10 000 խմ գազ սպառող բաժանորդները հունվարի 1-ից գազի 1 խմ դիմաց կվճարեն 139 դրամ: Սոցիալապես անապահով ընտանիքների համար յուրաքանչյուր 1000 խորանարդ մետր բնական գազի սակագինը կհաշվարկվի հատուկ բանաձևով. տարեկան մինչև 600 խորանարդ մետր գազ սպառողները 1 խմ դիմաց կվճարեն 100 դրամ, 600 խորանարդ մետրից ավել սպառելու դեպքում` 139 դրամ:
«Գազպրոմ Արմենիա» ՓԲԸ գլխավոր տնօրեն Հրանտ Թադևոսյանն իր ելույթում նշեց, որ գազի էժանացման հետ կապված բոլոր վնասներն ու ռիսկերը «Գազպրոմ Արմենիա» ՓԲԸ-ը վերցնում է իր վրա: Բացի այդ` ընկերությունը նաև լրացուցիչ օգուտներ է ակնկալում:
Հունվարի 1-ին լրանում է Վրաստանի տարածքով գազի տարանցման պայմանագրի ժամկետը, և նոր պայմանագրով ընկերությունը հույս ունի ավելի ցածր գին վճարել: Միաժամանակ, էժանացման արդյունքում բաժանորդները կսկսեն ավելի շատ գազ սպառել, ինչը նույնպես կավելացնի ընկերության եկամուտները:
«Գազի սակագնի իջեցումը նույնպես մեզ կբերի լրացուցիչ հասույթներ, քանի որ հուլիս ամսվա հաստատված գնով սակագինը ֆիքսված էր 1 մլրդ 721 մլն խմ սպառման գազի դիմաց, հիմա եթե զգալիորեն նվազում է գինը, կարծում եմ, որ սպառողները կօգտվեն և զգալիորեն կավելացնեն սպառման ծավալները: Դա կբերի համապատասխան, լրացուցիչ միջոցներ»,- ասաց ՓԲԸ տնօրենը:
Հայաստանյան ընկերության հնարավոր վնասները խոստացել է իր վրա վերցնել նաև ռուսական «Գազպրոմը»:
Հանրային ծառայությունները կարգավորող հանձնաժողովի որոշումն ուժի մեջ կմտնի 2017 թվականի հունվարի 1-ից։ Իսկ էլեկտրաէներգիայի խոստացված նոր` նվազեցված սակագինը, ՀԾԿՀ-ի մամուլի քարտուղարի խոսքով, կորոշվի արդեն դեկտեմբերի վերջին, քանի որ դրա չափն ուղղակիորեն կախված էր գազի նոր սակագնից:
