ԵՐԵՎԱՆ, 3 նոյեմբերի — Sputnik. Վարչապետ Կարեն Կարապետյանը կարծում է, որ գազի գինը կարող է նվազել, սակայն ոչ ի հաշիվ բյուջետային միջոցների:
«Որո՞նք են այս գումարների աղբյուրները: Առկա է չորս աղբյուր. հունվարի մեկին ավարտվում է Վրաստանի հետ տրանզիտի պայմանագիրը, և կան ակնկալիքներ, որ տրանզիտի գինը կնվազի: Երկրորդ՝ սակագների նվազման արդյունքում «Գազպրոմ Արմենիան» ակնկալում է շուկայի ընդլայնում, որը կբերի մի միավոր վաճառքի մարժայի նվազեցմանը: Երրորդ՝ որոշակի ֆինանսական ծախսերի և վարկերի նվազմանն արդյունքում «Գազպրոմ Արմենիան» կանի օպտիմալացում, չորրորդ՝ «Գազպրոմ Արմենիայի» հիմնադիրը շուկայի ընդլայնման և շուկայի կայունացման համար առաջացող ֆինանսական ռիսկերը վերցնում է իր վրա»,-ասաց վարչապետն` ընդգծելով, որ սա պարզ և հասկանալի գործընթաց է գազի սակագնի նվազման տեսանկյունից:
Այս պահին, նրա տեղեկացմամբ, սակագները հետևյալն են՝ 10 հազար խմ-ից ավելի գազ սպառողի համար 257.56 դոլարին համարժեք դրամը դարձել է 242.1 դոլար: Եթե տվյալ կազմակերպությունը սպառում է ավելի շատ գազ, քան նախկինում է սպառել, ցուցակը ներկայացնում է «Գազպրոմ Արմենիա», հետո սպառած հավելյալ գազի համար սակագինը 212 դոլար է դառնում:
««Գազպրոմ Արմենիան» փորձ է անում մոտիվացնել, որպեսզի շուկան մեծանա, ընդլայնի, իսկ բիզնեսը հնարավորություն ունենա իր ինքնարժեքի վրա ակտիվ շուկայի մեծացման հաշվին աշխատի, որպեսզի բիզնեսը շահավետ դառնա»,-ասաց Կարապետյանը:
Նրա խոսքով` 10 հազարից խմ-ից պակաս գազ սպառելու դեպքում սակագինը 146.7 դրամից դարձել է 139 դրամ, սոցիալապես անապահովների համար՝ 100 դրամ:
«Սոցապ նախարարությանն ու «Գազպրոմ Արմենիային» հանձնարարում եմ մինչև հունվարի 1-ը մաքսիմալ կարգավորել սոցիալապես անապահովների ցանկը, պատրաստվել մոտիվացիայի, որպեսզի սոցիալապես անապահովների ցանկը շատանա, դրա հետ մեկտեղ հստակ պետք է իմանանք՝ ով է սոցիալապես անապահով: Ինչ վերաբերում է ջերմոցներին և գյուղմթերք վերամշակող ձեռնարկություններին, սակագինը դառնում է 212 դոլար, 45 դոլարից ավելի նվազեցվում է»,-ասաց կառավարության ղեկավարը:
Վարչապետն ավելացրեց՝ բյուջեն որևէ կերպ չի սուբսիդավորելու այս գործընթացը` ո՛չ ստվերային, ո՛չ էլ ուղիղ կերպով։
