ԵՐԵՎԱՆ, 23 նոյեմբերի — Sputnik. «Սկոլկովո» նորարարական կենտրոնի զարգացման հիմնադրամի Ռոբոտատեխնիկայի կենտրոնի ռեզիդենտը (IT-կլաստերի)` Promobot ընկերությունը, սկսել է գործակցել Հայաստանի Ինֆորմացիոն տեխնոլոգիաների ձեռնարկությունների միության հետ (UITE), հայտնում է «Սկոլկովո» ընկերության մամուլի ծառայությունը։
«Promobot-ը մասնակցում է մի քանի տարի առաջ դպրոցականներին և ուսանողներին ՏՏ հիմունքների և ռոբոտատեխնիկայի ուսուցմանն ուղղված ԻՏՁՄ-ի կողմից գործարկված ծրագրին, որի նպատակն էր տեխնիկական մասնագիտություններում լուծել կադրային սովի խնդիրները», — գրված է հաղորդագրության մեջ։
Ծրագրի շրջանակներում նախատեսվում է 5000 դպրոցական պատրաստել տեխնիկական բուհ ընդունվելու և երկրում IT ձեռնարկատիրության զարգացմանն ուղղված միջավայր ձևավորելու համար։ Նաև՝ Ճարտարագիտական համալսարանին կից ստեղծվել են մի քանի տասնյակ նորարական լաբորատորիաներ և Գերազանցության կենտրոն։
Հաղորդագրության համաձայն, Promobot ընկերությունը գործակցության շրջանակներում Հայաստան կմատակարարի Promobot v3 մոդելի երկու ռոբոտ և IT-ի և ռոբոտատեխնիկայի ուսուցման համար նախատեսված բաց կոդի հիման վրա դպրոցականներին ու ուսանողներին կապահովի իր բացառիկ հարթակով։
Բացի այդ, նախատեսված է զարգացնել համատեղ կրթական ծրագրերը։ Promobot ընկերության գլխավոր տնօրեն Ալեքսեյ Յուժակովը նշել է, որ Promobot v3-ն առաջին հերթին ռոբոտատեխնիկական բացառիկ հարթակ է, որի հիմքում ընկած է ընկերության մշակած բաց կոդը (SDK)։
«Ցանկացած ծրագրավորող, լաբորատորիա և կրթական հաստատություն կարող է կոնկրետ ոլորտներում կոնկրետ նեղ խնդիրներ լուծելու համար ռոբոտին ուսուցանելու հավելված մշակել կամ օգտագործել հարթակը սկսնակ ֆոտոտեխնիկաներին և AI-ով հետաքրքրվող մարդկանց կրթելու համար։ Շատ ուրախ ենք, որ Promobot-ի գործընկերների շարքում հայտնվեց ԻՏՁՄ-ն», — ասել է Յուժակովը։
Նրա խոսքով` Հայաստանը միշտ էլ հայտնի է եղել բնական և տեխնիկական գիտություններում գերազանց կրթություն տրամադրելով։ Յուժակովը համոզված է, որ Promobot-ը կարող է այն նախագիծը դառնալ, որի շուրջ կհավաքվեն Հայաստանի տարբեր ծայրերից օժտված և շահագրգիռ երիտասարդների թիմեր։
Հայաստանի ինֆորմացիոն տեխնոլոգիաների ձեռնարկությունների միության ղեկավար Հայկ Չոբանյանն իր հերթին նշեց, որ 2009 թվականից Արմռոբոտիքս ծրագիրը Հայաստանում երեք ուղղությունների վրա է կենտրոնացած. ընդհանուր ռոբոտաշինություն, ռազմական ռոբոտաշինություն և ԱԹՍ-ների ստեղծում։
«Հուշագրի ստորագրումից հետո մեր երեխաները հնարավորություն կունենան ռոբոտաշինության բնագավառում աշխատել։ Promobot-ի հետ համագործակցության շրջանակներում համատեղ նախագծեր, միջոցառումներ, մրցույթներ կունենանք, ինչը կբերի Հայաստանի ինժեներական փորձի հարստացմանը»,- նշել է Չոբանյանը։
Ռուսական Promobot ընկերության Promobot v3-ը շուկայում առաջին, բարդ բնավորություն ունեցող բացարձակ ավտոնոմ «կենդանի» ռոբոտն է։ Նա նախատեսված է հոծ բազմությամբ վայրերում լինելու համար, որտեղ ռոբոտը մարդկանց օգնում է նավիգացիայի հարցերում, պատասխանում է ցանկացած հարցի, գովազդային նյութեր հեռարձակում և հիշում յուրաքանչյուրին, ում հետ հաջողվել է շփվել։
