ԵՐԵՎԱՆ, 22 նոյեմբերի — Sputnik. Հայաստանի Կենտրոնական բանկը տեղեկություն չունի այն մասին, որ իրականացվել է հաքերային հարձակում երկրի առևտրային բանկերից կամ բանկոմատներից գոնե մեկի վրա։ Այդ մասին Sputnik Արմենիային հայտնեց Հայաստանի Կենտրոնական բանկի մամուլի քարտուղար Հարություն Բերբերյանը` մեկնաբանելով ԶԼՄ-ներում տարածված տեղեկությունն այն մասին, որ հայկական բանկերի վրա կատարվել են հաքերային գրոհներ։
Նրա խոսքով` առաջիկայում Հայաստանի ԿԲ-ն պաշտոնական հաղորդագրություն կտարածի, իսկ առայժմ ավելի լավ է զերծ մնալ նման տեղեկատվություն տարածելուց։
«Առայժմ կարող եմ ասել հետևյալը. մենք տեղեկություն չունենք այն մասին, որ տուժել է թեկուզ մեկ առևտրային բանկ կամ կատարվել է հարձակում բանկոմատների վրա։ Եթե նման տեղեկատվություն լիներ, ապա մենք կհաստատեինք այն», — ասաց Բերբերյանը։
Նա հավելեց, որ հայտնած տեղեկությունն ընդամենը կազմակերպության զեկույցն է, որն ուսումնասիրում է կիբեր-հանցագործությունները։
«Այնտեղ այդպիսի փաստ չկա, և կոչ եմ անում ԶԼՄ-ներին ավելի ուշադիր լինել նման դեպքերում»,- ասաց Բերբերյանը։
Պատասխանելով Sputnik Արմենիայի հարցերին` Բերբերյանը հավելեց, որ ԿԲ ամբողջ համակարգը և բանկին կից գործող այլ համակարգերը պաշտպանված են միջազգային չափանիշներով սահմանված անվտանգության համակարգերին համապատասխան։ Նրա խոսքով` պաշտպանվածության աստիճանը բարձր է։
Միաժամանակ տեղեկատվական անվտանգության հարցերով փորձագետ Սամվել Մարտիրոսյանը, մեկնաբանելով իրավիճակը, կոչ արեց չանտեսել զեկույցը։
«Հարձակման մասին գրում է Group-IB ռուսական ընկերությունը, որն աշխատում է միջազգային շուկայում և լուրջ կշիռ ունի, այն հայտնի է նրանով, որ հայտնաբերել է այլ խոշոր բանկային գրոհներ, օրինակ, Carbanak։ Այնպես որ, ես ուշադիր կլինեի նրանց հաշվետվությունների նկատմամբ։ Group-IB-ի համաձայն, հարձակումը կատարել է «Կոբալտ» անունով խումբը»,- ասաց Մարտիրոսյանը։
Նրա խոսքով` զեկույցում խոսվում է այն մասին, որ հարձակումն իրականացվել է բանկի վրա, այլ ոչ բանկոմատների, այսինքն, հաճախորդները կարող են չանհանգստանալ։
Ավելի վաղ Ռոյթերս գործակալությունը հայտնել էր, որ միջազգային հանցավոր խումբը մի շարք հեռահար կիբեռհարձակումներ է իրականացրել ավելի քան 10 երկրների, այդ թվում՝ Հայաստանի, Ռուսաստանի, ԱՊՀ այլ պետությունների և Եվրամիության բանկոմատների վրա:
