ԵՐԵՎԱՆ, 4 սեպտեմբերի — Sputnik. Ադրբեջանական հաքերների կողմից Հայաստանի կառավարության օգտագործման տակ գտնվող սերվերները կոտրելու մասին տեղեկությունը փիար-նենգություն է, Sputnik Արմենիային ասաց տեղեկատվական անվտանգության փորձագետ Սամվել Մարտիրոսյանը:
Ավելի վաղ ԶԼՄ-ներում տեղեկատվություն է հայտնվել այն մասին, որ ադրբեջանական հաքերային խմբավորումն, իբր, գողացել է Հայաստանի ԱԱԾ փաստաթղթերը, որի արդյունքում նրանց տրամադրության տակ են հայտնվել Հայաստան մուտք գործած արտասահմանյան քաղաքացիների անձնագրային տվյալները:
Մարտիրոսյանի խոսքով, մի քանի տարի առաջ ադրբեջանական հաքերներին իսկապես հաջողվել է առևանգել կարևոր տվյալներ, իսկ այսօրվա նորությունը սուտ է:
«Դա PR ակցիա է ադրբեջանական հաքերների կողմից: Երկու տարի առաջ նրանք կարողացան «տանել» արխիվը հին կայքից, որը թույլ է տալիս օնլայն ռեժիմում վիզաներ ստանալ Հայաստան մուտք գործելու համար:
Արխիվը, որպես սուբդոմեն, գտնվել է Հայաստանի ԱԱԾ կայքում, և դրանից վաղուց չեն օգտվել»,- ասաց փորձագետը:
Նա հավելեց, որ հաքերներին այդ ժամանակ հաջողվել է գողանալ փաստաթղթերը և հրապարակել, բայց դա մեծ աղմուկ չի բարձրացրել:
«Քանի որ վերջին մեկուկես տարում ադրբեջանական հաքերներին չի հաջողվել լուրջ գրոհներ կատարել հայկական ցանցի վրա, նրանք սովորություն են դարձրել հին «սխրանքները» որպես նոր ներկայացնել»,- ասաց Մարտիրոսյանը:
Նրա խոսքով, դա արդեն երրորդ կամ չորորդ դեպքն է, երբ հաքերները, «հիշելով նախկին փառքը», հանում են իրենց արխիվները և հին հաքերային գրոհները ներկայացնում որպես նոր:
Մարտիրոսյանը նշեց, որ այս անգամ այդ թեման ակտիվորեն տարածել է թուրքական մամուլը, դրա համար էլ հաջողվել է աղմուկ բարձրացնել:
Հայաստանի ԱԱԾ-ը չի մեկնաբանում այդ տեղեկությունը, ուստի ադրբեջանական ստահոդ լուրերը շարունակում են տարածվել համացանցում:
