ԵՐԵՎԱՆ, 22 նոյեմբերի — Sputnik. Ռուսաստանի հայերի միության ղեկավար Արա Աբրահամյանը 2017 թվականին ցանկանում էր մասնակցել Հայաստանի խորհրդարանական ընտրություններին, սակայն, որոշակի հանգամանքներից ելնելով, նա չի կարող դա անել։ Այդ մասին երեքշաբթի լրագրողներին ասաց Աբրահամյանը։
Նրա խոսքով` ոչ բոլորն էին ճիշտ ընկալում իր որոշումը, սակայն դա իրեն չի անհանգստացնում։
«Ես հասկացա, որ հնարավորություն ունեմ աջակցելու երկրիս, օգնելու նրա զարգացմանը ոչ ստանդարտ մոտեցումներով, որպեսզի քաղաքացիները յուրաքանչյուր ամիս զգան կատարվող փոփոխությունները։ Ուզում եմ, որ դա նկատելի լինի ոչ միայն խոսքերով, այլև իրական գործողություններով», — ասաց Աբրահամյանը։
Ի՞նչը ստիպեց Աբրահամյանին մեկնել
Ռուսաստանի հայերի միության նախագահը փորձել է բացատրեց իր որոշման պատճառները։ Մասնավորապես, նա հիշեցրեց, որ անցյալ տարվա նոյեմբերին առողջական խնդիրներ ուներ, հենց այդ պատճառով էլ յոթ ամիս հորիզոնում չէր երևում։
«Այժմ ամեն ինչ նորմալ է, սակայն անձնական խնդիրներ կան, որոնց պատճառով ես Հայաստանում չեմ լինելու։ Ցավոք, ես հիմա մեկնում եմ և կվերադառնամ հաջորդ տարի մարտի կեսերին», — ավելացրեց Աբրահամյանը։
Ընդ որում, ՌՀՄ ղեկավարի խոսքով, նա շարունակելու է աջակցել Հայաստանին և հայ ժողովրդին` օգտագործելով ամբողջ աշխարհում ունեցած իր լավ կապերը։
Աբրահամյանը շտապեց հայտնել, որ մարել է հայկական բանկերից վերցրած վարկերի պարտքերը, այսօրվա դրությամբ նա «անգամ մեկ դոլար պարտք վարկերի գծով» չունի։
Միտված է արտերկրի
Աբրահամյանը հայտնել է, որ զարգացնելու է ԵՏՄ ֆորումը, որը մեծ սոցիալ-տնտեսական և ռազմավարական նշանակություն ունի, սակայն աշխատելու է արտերկրում։
«Ես աշխատելու եմ արտերկրում, իսկ այն մասին, որ չեմ մասնակցելու խորհրդարանական ընտրություններին` երկար չեմ խոսի»,- նշեց նա։
Աբրահամյանի խոսքով` միայն անցյալ տարվա ընթացքում հասցրել է իրականացնել 27 միջազգային նախագիծ։ Նրա կազմակերպությունն ամեն տարի ընդլայնում է ցուցաբերած մարդասիրական օգնության ծավալները։
Այսպիսով` Աբրահամյանը չի մտնի Հայաստանի մեծ քաղաքականություն և կշարունակի զբաղվել տնտեսական և մարդասիրական ծրագրերով։
Պատգամավորական աթոռի համար նախընտրական արշավին մասնակցելուց հրաժարվելով` նա, միևնույն ժամանակ, հայտնեց, որ չի որոշել, թե որ քաղաքական ուժին է սատարելու առաջիկա խորհրդարանական ընտրություններին։ Աբրահամյանն ասաց, որ վերջնական ընտրություն կատարելու համար պետք է մանրամասն ծանոթանա թեկնածուների նախընտրական ծրագրերին։
