ԵՐԵՎԱՆ, 30 նոյեմբերի- Sputnik. «Ռուսաստանի հայերի միությունը» սատարում է Օսմանյան Թուրքիայում Հայոց ցեղասպանությունը ժխտելու համար քրեական պատասխանատվություն սահմանելու մասին օրինագծին և Պետդումայի խոսնակին և չորս խմբակցության առաջնորդներին խնդրում սատարել փաստաթղթի ընդունմանը։
Նախորդ շաբաթ «Արդար Ռուսաստան» կուսակցության առաջնորդներ Սերգեյ Միրոնովը և Նիկոլայ Լևիչևը Պետդումայում օրինագիծ են ներկայացրել 1915-1922թթ.-ին Օսմանյան Թուրքիայում Հայոց ցեղասպանությունը ժխտելու համար պատասխանատվություն սահմանելու մասին։
«Ռուսաստանի հայերի միությունը» հայտարարել է, որ այդ օրինագիծն անհրաժեշտ է ՌԴ անվտանգության ամրապնդման համար, կոչ է արել սատարել այդ կարևոր օրենսդրական նախաձեռնությանը
«ՌԴ-ում նման օրենքի ընդունումը լուրջ և համակարգված մեխանիզմ կստեղծի Հայոց ցեղասպանության պատմական փաստերի խեղաթյուրման և կեղծիքի, ԶԼՄ-ներում ապատեղեկատվության, լրագրողների, բլոգերների կաշառքի, «փորձագետների» և պետական ծառայողների դեմ պայքարում, ինչը թույլ կտա մոլորության մեջ չգցել Ռուսաստանի քաղաքացիներին և չանարգել մահացածների հիշատակը, ինչպես նաև իրական հիմք կստեղծի թուրքական կառավարության նման գործողությունների կրկնությունը կանխելու համար»,- կարծում է միության նախագահ Արա Աբրահամյանը։
Միաժամանակ նա շնորհակալություն է հայտնել Ռուսաստանին Հայոց ցեղասպանության դատապարտման հարցում օբյեկտիվ և հետևողական դիրքորոշման համար։
Օրինագծի համաձայն, եթե հերքումը կատարվել է հրապարակավ, ապա այդ արարքի համար առաջարկվում է պատժել մինչև 300 հազար ռուբլի տուգանքով կամ մինչև երեք տարի հարկադիր աշխատանքներով կամ մինչև երեք տարի ազատազրկումով։
ԶԼՄ-ները կամ ծառայողական դրությունը օգտագործած անձինք հերքելու համար կպատժվեն 100-500 հազար ռուբլի տուգանքով կամ մինչև հինգ տարի հարկադիր աշխատանքներով կամ նույն ժամկետով ազատազրկումով` մինչև երեք տարի առանց որոշակի պաշտոններ զբաղեցնելու կամ որոշակի գործունեություն ծավալելու իրավունքի։
