ԵՐԵՎԱՆ, 31 հոկտեմբերի- Sputnik, Գոռ Մարգարյան. Տեղեկատվական տեխնոլոգիաների ոլորտը զարգանում է անասելի արագությամբ: Նոր սերունդը ծնվում է թվային տեխնոլոգիաների միջավայրում, միջին սերունդը՝ օգտվում դրանցից, ավագները՝ հարմարվում դրանց:
Անլար կապի նոր հնարավորություն
Wi-Fi անլար կապը հասել է իր կարողությունների սահմանին: Մեզ՝4G ու 4G+ սերնդի բջջային ինտերնետ օգտագործողներիս, արդեն չի բավարարում այն, ինչ տալիս են մեր տնային ինտերնետ օպերատորները: Ինձ թվում է՝ բոլորն էլ կհամաձայնեն, որ տհաճ է, երբ փողոցում ինտերնետիդ արագությունը հասնում է մոտ 300 Մբ/վ-ի, իսկ տանը երեք անգամ թույլ է: Մի քիչ էլ դիմացեք, որովհետև անլար կապը 2017թ. կդառնա ավելի արագ, քանի որ Wi-Fi —ին փոխարինելու է գալիս գերարագ WiGig կապը` կրկնապատկելով Wi-Fi-ի ներկայիս արագության ցուցանիշը: Այստեղ կա մի բայց. WiGig-ը կունենա ծածկույթի շատ կարճ շառավիղ՝ 10 մետր և հասանելի կլինի միայն սմարթֆոնների ու պլանշետների համար:
Նախագիծն իրականացնող Wi-Fi Allianc ընկերության ներկայացուցիչ Քևին Ռոբինսոնի կարծիքով` այդ սահմանափակումը լուրջ թերություն է WiGig-ի համար: Միևնույն ժամանակ, ըստ նրա, սա բավական խոստումնալից տեխնոլոգիա է, որը հեռանկարային է հատկապես լայն տարածում գտած վիրտուալ իրականության սարքերի համար:
«Խնձորային» սենսացիա
Վերջին 6 տարվա ընթացքում առաջին անգամ Apple-ը հետաձգել է իր արտադրանքի վաճառքի օրը։
Ամենայն հավանականությամբ հիշում եք ոչ վաղ անցյալում Apple կազմակերպության ներկայացրած AirPods անլար ականջակալները, որոնք ստիպած էին գնել յոթերորդ սերնդի iPhone-ների օգտատերերը, քանի որ «հանճարեղ» խնձորականները որոշել էին, որ մարդկությանն այլևս պետք չեն ականջակալի անցքեր: Եվ Apple ընկերությունը հայտարարել է, որ վերոնշյալ ականջակալները չեն հայտնվի վաճառքում այս ամսվա վերջին ինչպես որոշված էր, և շուկա հանելու ժամկետը հետաձգվել է անորոշ ժամանակով: Գուցե ավելի լավ կլինե՞ր, եթե ընդհանրապես հետ կանչեին բոլոր iPhone 7-երը և վերադարձնեին ականջակալի անցքով:
Facebook-ը դեմ է ոչ հավաստի տեղեկություններին
Փաստորեն մեգասոցցանց Facebook-ը, բացի շահույթ ունենալուց, նաև մտահոգվում է մեզանով: Ցուկերբերգը չի ուզում, որ իր կայքի օգտատերերն իրենց NewsFeed-ում տեսնեն ոչ հավաստի տեղեկություն: Բայց Facebook-ի նորությունների ժապավենի ալգորիթմը, որը նախատեսված է ոչ հավաստի տեղեկության դեմ պայքարի համար, չի ծառայում ընկերության ծրագրավորողների դրած նպատակին: Ինձ թվում է` Facebook-ի ծրագրավորողները դեռևս հեռու են այս խնդիրը լուծելուց, քանի որ շատ բարդ է ստեղծել այնպիսի ալգորիթմ, որն ավտոմատ առանձնացնի հավաստի և ոչ հավաստի տեղեկությունները և ներկայացնի մեզ: Այնպես որ առայժմ պետք է հույսներս դնենք մեր մեդիագրագիտության վրա և ինքնուրույն զտենք ու գտնենք այն կայքերը, որոնք հավաստի տեղեկություն են տարածում:
Apple-ի նորույթը
Բոլորս էլ գիտենք, որ կրծած խնձորի կազմակերպությունը համարվում է բացարձակ առաջատարներից մեկը նորագույն գաջեթների արտադրման ոլորտում, և դա նաև վերաբերում է նրանց արտադրած համակարգիչներին: Անգամ նրանք, ովքեր ինչ-ինչ պատճառներով հակակրանք ունեն Apple-ի արտադրանքի հանդեպ, միևնույն է՝ չեն կարող անտարբեր անցնել ընկերության նոութբուքների կողքով: Իսկ Apple-ն այս տարվա վերջին միջոցառման ժամանակ ներկայացրել է նոր սերնդի MacBook Pro նոթբուքը:
Նոր գաջեթների հիմնական առանձնահատկությունը վերին շարքում տեղադրված սենսորային ստեղներն են: Մկնիկի գործառույթ կատարող հատվածը զգալիորեն մեծացվել է նախորդ մոդելների համեմատ: Բացի այդ, MacBook Pro-ն աշխատում է մատնահետքի միջոցով ճանաչման Touch ID համակարգով, որի օգնությամբ հնարավոր կլինի փոխել օգտատերերին: Համակարգիչը ներկայանալու է 13 և 15 դյույմ անկյունագծերով և երկու գունային տարբերակով` բաց և մուգ մոխրագույն: 13 դյույմ անկյունագծով MacBook Pro-ի հաստությունը կկազմի 14.9 մմ, այսինքն` 3.1 մմ-ով ավելի բարակ, քան նախորդ մոդելը: Նորագույն MacBook Pro նոթբուքերը համապատասխանաբար կարժենան 1799 և 2399 դոլար: Շատերի կարծիքով`` սա շաբաթվա նորությունն է. Բայց ես այդպես չեմ կարծում և ինձ թվում է դուք էլ համաձայն կլինեք, երբ կարդաք հաջորդ լուրը:
Microsoft-ն ընդդեմ Apple-ի
Ստեղծագործ և ուղղակի հզոր ու գեղեցիկ համակարգիչ սիրող մարդկանց համար Microsoft-ը ներկայացրել է ուշագրավ նորույթ, որն իրենից ներկայացնում է մոնոբլոկ համակարգիչ ու ստացել է Surface Studio անվանումը: Իսկ ի՞նչ է իրենից ներկայացնում Surface Studio-ն: Նախ սկսենք նրանից, որ նա Apple-ի iMac-ի արժանի մրցակիցն է: Այս համակարգիչը համալրված է 28 դյույմանոց սենսորային էկրանով, որի հաստությունը ընդամենը 12.5 մմ է: Գերբարակ էկրանը հնարավոր է օգտագործել նաև հորիզոնական դիրքով: Այդ վիճակում այն կծառայի որպես պլանշետ: Ահա թե ինչու էի ասում, որ այս նորույթը նախատեսված է ստեղծագործների համար: Microsoft-ը Surface Studio-ի պաշտոնական գովազդում ներկայացնում է, թե ինչ գլուխգործոցներ են նկարում մարդիկ այս համակարգիչ-պլանշետի միջոցով:
Կախված մոդելից, նորույթը համալրված կլինի Intel Core i5 կամ i7 պրոցեսորներով:
Իսկ ամենազարմացնողն այս նախագծում դրա գինն է. առավելագույն համալրումով մոդելը հնարավոր կլինի ձեռք բերել 4 200 դոլարով: Եվ եթե այդքան գումար ունեք քարտի վրա և լավ համակարգիչ եք ցանկանում գնել, ապա ընկերության կայքում արդեն պատվերներ են ընդունում:
