ԵՐԵՎԱՆ, 21 նոյեմբերի — Sputnik, Դավիթ Գալստյան. Ինքնաթիռի տոմսի ցածր գներ առաջարկող ռուսական «Պոբեդա» ավիաընկերությունը սկսել է Մոսկվայի «Վնուկովո» օդանավակայանից դեպի Գյումրի չվերթերի տոմսերի վաճառքը։
Տվյալ ուղղությամբ առաջին թռիչքը, ըստ ընկերության կայքում տեղադրված տեղեկության, տեղի կունենա դեկտեմբերի 15-ին։ Ստանդարտ տոմսի արժեքը 999 ռուբլի է (16 դոլարից պակաս)։
«Գինը նշված է` հաշվի առնելով բոլոր տուրքերը։ Որևէ բանի համար պետք չի լինի հավելյալ վճարել, եթե հավելյալ ծառայությունների կարիք չկա», — Sputnik Արմենիային ասաց ընկերության մամուլի քարտուղար Ելենա Սելիվանովան։
Առանց հավելավճարի ուղևորները հնարավորություն կունենան ինքնաթիռի սրահում տեղափոխել անձնական իրերը` փոքրիկ պայուսակ կամ պորտֆել (մինչև 75 սմ), հովանոց, ձեռնափայտ, ծաղիկներ, վերնահագուստ, կոստյում, կարդալու գրականություն, դյուրակիր համակարգիչ։ Կարելի է նաև տանել մինչև 10 կգ ուղեբեռ։
Սակագները
Ավիաընկերությունն առաջարկում է երեք սակագին։
Ստանդարտ սակագինը 999 ռուբլի է (մոտ 16 դոլար), ներառում է մինչև 10 ուղեբեռ։ Պլյուս սակագինը 2098 ռուբլի է (մոտ 33 դոլար), այն ներառում է մինչև 10 կգ ուղեբեռ և սեփական հայեցողությամբ տեղ ընտրելու հնարավորություն։
Պրեմիում սակագինը կարելի է ձեռք բերել 5999 ռուբլով (մոտ 93 դոլար)։ Այն ներառում է ինքնաթիռի սրահում մինչև 10 կգ ուղեբեռ, ինչպես նաև մինչև 20 կգ սովորական ուղեբեռ, տեղ ընտրելու հնարավորություն։ Բացի այդ` թույլատրվում է թռիչքի օրվա և ժամի փոփոխություն, ինչպես նաև տոմսի վերադարձ։ Այդ սակագները կարելի է ընտրել նաև ` հաշվի առնելով ուևորների տեղափոխումը Երևանից դեպի Գյումրի։ Նման դեպքում տոմսի արժեքին գումարվում է 500 ռուբլի (մոտ 8 դոլար)։
Հավելյալ ծառայություններ
Եթե դուք ընտրել եք ստանդարտ սակագինը, ապա բացի Երևանից Գյումրի ուղևորությունը` կարելի է հավելյալ ծառայություններ պատվիրել, որոնք կարող են տոմսից ավելի թանկ լինել։ Առաջին հերթին դա վերաբերում է ուղեբեռին։
Հավելյալ ուղեբեռի արժեքը կազմում է 999 ռուբլուց (մինչև 10 կգ ուղեբեռ ինքնաթիռի սրահում) մինչև 2499 ռուբլի (20+20 կգ` 39 դոլար)։ Իսկ, օրինակ, ընտանի կենդանու (կամ հեծանիվի, սնոուբորդի) տեղափոխումը կարժենա 2000 ռուբլի (31 դոլար)։ Ուսապարկերը, տոպրակները, տուփերը, ծովափնյա և մարզական պայուսակները ինքնաթիռի սրահում կտեղափոխվեն վճարովի։
Ընկերությունն առաջարկում է նաև օգտվել ապահովագրությունից` թռիչքը հետաձգվելու, ուղեբեռի կորստի կամ վնասվելու, դժբախտ պատահարի դեպքում (199 ռուբլի կամ 3 դոլար)։ Բացի այդ` հավելյալ վճարի դիմաց (149 մինչև 999 ռուբլի) կարելի է կարելի է տեղ ընտրել ինքնաթիռում։
Նյութը գրելու պահին ինքնաթիռում արդեն մոտ 15 տեղ էր ամրագրված։ Տեղ ամրագրելիս գծագրի վրա երևում է ուղևորների սեռը, այնպես որ կարելի է տեղ ընտրել կնոջ կամ տղամարդու կողքին։
«Աերոֆլոտ» խմբին պատկանող «Պոբեդա» ավիաընկերությունը ստեղծվել է 2014 թվականի սեպտեմբերի 16-ին «Դոբրոլյոտ» փոխադրողի փոխարեն, որը նույն տարվա աշնանը դադարեցրել է թռիչքները Եվրամիության պատժամիջոցների ցուցակում հայտնվելուց հետո: «Պոբեդան» գործում է Մոսկվայի «Վնուկովո» օդանավակայանում։ 2015 թվականի արդյունքներով` ավիաընկերությունը սպասարկել է 3.09 մլն ուղևոր: Ռոսավիացիայի տվյալների համաձայն` փոխադրողն այս ցուցանիշով ՌԴ քաղավիացիայում 7-րդ տեղն է զբաղեցրել:
