ԵՐԵՎԱՆ, 21 նոյեմբերի — Sputnik. Արտաքին գովազդի առաջին փառատոնին կմասնակցեն առաջատար գովազդային գործակալությունների ներկայացուցիչները, լրագրողներին հայտնեց Երևանի քաղաքապետարանի արտաքին ձևավորման և գովազդի վարչության պետ Արազ Բաղդասարյանը։
Նրա խոսքով` փառատոնի նպատակն է խթանել տարածաշրջանում գովազդի ոլորտի զարգացումը, հայկական գովազդի նմուշները ներկայացնել միջազգային շուկայում։
«Հրավիրված են արտաքին գովազդի ոլորտում առաջատար մասնագետներ: Նպատակներից է նաև գովազդի հայկական շուկա բերել միջազգային փորձը։ Սա թույլ կտա օբյեկտիվ գնահատել հայրենական գովազդը», — նշեց Բաղդասարյանը։
Նա ավելացրեց, որ փառատոնի շրջանակում Երևան կժամանեն աշխարհի առաջատար DDB-ի, BBDO-ի, Saatchi & Saatchi, Zeno Group-ի գովազդային գործակալությունների արտ-տնօրենները:
Նախատեսված է նաև միջազգային ճանաչում ունեցող գովազդային փորձագետների և ոլորտի տեղական պատասխանատուների մասնակցությամբ մասնագիտական համաժողովի, ինչպես նաև վարպետության դասերի անցկացում:
Ծրագրի շրջանակում ներկայացված հայկական գովազդի շուկայի լավագույնը ճանաչված նմուշները կպարգևատրվեն հեղինակավոր ժյուրիի կողմից՝ համապատասխան անվանակարգերում:
«Վարպետության դասերին կմասնակցեն ոչ միայն գովազդային ոլորտի ներկայացուցիչները, այլև` գովազդի բնագավառում ուսում ստացող ուսանողները, որոնք մտադիր են համապատասխան ուսումնասիրություններ անցկացնել։ Սա թույլ կտա զարգացնել հայկական գովազդի շուկան», — ասաց Բաղդասարյանը։
Փառատոնի պաշտոնական փակման արարողությունը տեղի կունենա նոյեմբերի 25-ին և գովազդի ոլորտի մրցանակաբաշխության շրջանակում կամփոփվեն 8 անվանակարգում (լավագույն գովազդային ակցիա, կրեատիվ մոտեցում, լավագույն սոցիալական գովազդ, նոր շունչ, լավագույն ադապտացիա, լավագույն գովազդային կրիչ, հանրային քվեարկություն, Երևան քաղաքի լավագույն գործընկեր) ներկայացված աշխատանքները։
Ժյուրիի անդամներից մեկը` Saatchi&Saatchi ընկերության ներկայացուցիչ Ֆաբիո Կոստան, իր հերթին նշեց, որ առաջին անգամ է Հայաստանում և առաջին անգամ է մասնակցում մասնագիտացված փառատոնի։
«Համոզված եմ, որ բոլոր աշխատանքներն էլ հետաքրքիր կլինեն։ Անհամբեր սպասում եմ այն պահին, երբ հնարավոր կլինի տեսնել և գնահատել դրանք», — ասաց Կոստան։
Նրա խոսքով` «Զվարթնոց» օդանավակայանից Երևան գալու ճանապարհին զարգացած ենթակառուցվածքներ և գովազդային շատ վահանակներ է տեսել։
Կոստան ընդգծեց, որ Հայաստանում շահագրգռված են գովազդային ոլորտի զարգացման հարցում, և որոշ ընկերություններ հետաքրքրվում են այդ դաշտի նորամուծություններով, որպեսզի հետագայում դրանք կիրառեն նաև գործնականում։
