ԵՐԵՎԱՆ, 15 նոյեմբերի — Sputnik. Հայկական բուհերը պատրաստ են յուրաքանչյուրին որակյալ կրթություն տալ, Sputnik Արմենիային ասաց Մարքեթինգի հայկական ասոցիացիայի նախագահ Արամ Նավասարդյանը։
Sputnik Արմենիա մուլտիմեդիոն մամուլի կենտրոնում տեղի ունեցավ Երևան-Մոսկվա-Աստանա-Բիշքեկ-Քիշնև-Մինսկ տեսակամուրջ` «ԱՊՀ երկրների ինտեգրացիոն նախապատվությունները» թեմայով։ Միջոցառման ընթացքում ներկայացվել է նոր սոցիոլոգիական հետազոտություն ԱՊՀ և ԵՏՄ անդամ երկրների բնակիչների ինտեգրացիոն նախապատվությունների մասին։
Վերջին հետազոտությունների արդյունքները, որոնք անցկացվել են «Եվրասիական մոնիտոր» միջազգային հետազոտական գործակալության և Մարքեթինգի հայկական ասոցիացիայի կողմից, ցույց են տվել, որ ԱՊՀ երկրների վարկանիշը տարեցտարի ընկնում է։
Նավասարդյանի խոսքով` կարծիք կա, որ Հայաստանում կրթության որակն ընկել է, բայց փորձագետն անձամբ համաձայն չէ այդ կարծիքի հետ։
«Ես համաձայն չեմ դրա հետ։ Մի կողմից` շատ բուհերում տեխնիկական և տեղեկատվական բազան հետ է մնում, և այսօրվա չափանիշներով պրոֆեսիոնալիզմով աչքի են ընկնում ոչ բոլոր դասախոսները, սակայն մենք ունենք նաև այնպիսի բուհեր, որտեղ կրթության մակարդակը համապատասխանում է միջազգային չափանիշներին։ Հաճախ դիպլոմ ունեցող մարդիկ, որոնց մոտ գիտելիքները շատ բարձր մակարդակի վրա չեն, մեղադրում են «հին դպրոցի» դասախոսներին, որոնք իրենց ոչինչ չեն սովորեցրել», — ասաց Նավասարդյանը։
Նա նշեց, որ չի ընդունում այդ կարծիքը։
«Այս դարում գիտելիքների ձեռք բերումը հասանելի է գրեթե բոլորին։ Այսինքն` չի կարելի մեղքը բարդել այն բանի վրա, որ բուհերում գրադարանը նորացված չէ։ Դա, իհարկե, այդպես է, բայց կրթություն ստանալ ցանկացող մարդը կարող է օգտագործել այդ բազան, ինչպես նաև բարձրացնել իր որակավորումն համացանցային վճարովի և անվճար կայքերի օգնությամբ», — ասաց փորձագետը։
Նրա խոսքով` սխալ է մտածել, որ Եվրոպայի բոլոր համալսարանները կարող են լավ կրթություն տալ։
«Ուրիշ հարց է, որ այնտեղ ուսանողներն ավելի պահանջկոտ են դասախոսների նկատմամբ և ձգտում են գիտելիք ստանալ»,- ասաց նա։
Իր հերթին «Եվրասիան մոնիտոր» միջազգային հետազոտական գործակալության գործադիր տնօրեն Իգոր Զադորինը, պատասխանելով Sputnik Արմենիայի հարցին, նշեց, որ տեղեկատվական ազդեցությունը, հեղինակությունը մեծ դեր են խաղում տարբեր երկրներում կրթության գրավչության գործում։
«Այո, Ռուսաստանում կրթություն ստանալու ցուցանիշները նվազել են, և հենց Ռուսաստանում լուրջ բանավեճեր են ընթանում կրթության որակի վերաբերյալ, բնականաբար, դա չի կարող չանդրադառնալ պոտենցիալ ուսանողների ընկալման վրա։ Արևմտյան կրթության մրցակցությունը, ինչպես նաև արևմտյան կրթության առաջարկն աճում է։ Այստեղ շատ կարևոր է նշել հետազոտությունների արդյունքները, որոնք ցույց են տալիս տարբեր երկրներում կրթության նախապատվությունների և աշխատանքային միգրացիայի նախապատվության միջև կապը»,- ասաց Զադորինը։
Նա հավելեց, որ կրթությունը մեծամասամբ կապված է այն բանի հետ, թե ինչպիսին է մարդը հետագայում տեսնում իր մրցունակությունն աշխատաշուկայում։ Զադորինի խոսքով` կրթության հեղինակությունը պետք է բարձրացնել աշխատաշուկայի հեղինակության և տնտեսական կոոպերացիաների հետ միասին։
