ԵՐԵՎԱՆ, 19 նոյեմբերի — Sputnik. Քանդակագործ Գեորգի Ֆրանգուլյանն ավարտում է քաղաքական ճնշումների զոհերին նվիրված հուշարձանը: Այն կտեղադրվի Մոսկվայում, Սադովայա-Սպասսկայա փողոցների և ակադեմիկոս Սախարովի պողոտայի խաչմերուկում:
Այս նախագծի քննարկման ժամանակ Ռուսաստանի նախագահ Վլադիմիր Պուտինի հրամանագրում գրված էր, որ Ռուսաստանի կառավարությունն ու Մոսկվայի կառավարությունը առանցքային դեր են խաղում ֆինանսավորման հարցում։ Սակայն կամավոր նվիրատվություններն էլ պիտի զգալի մաս կազմեին:
Քաղաքական ճնշումների զոհերին նվիրված հուշարձանը ստեղծվում է Գեորգի Ֆրանգուլյանի «Վշտի պատ» նախագծով: Հուշարձանը 32 մետր երկարությամբ և 6 մետր բարձրությամբ բրոնզե հարթաքանդակ է, որի վրա ողջ մնացած և զոհված մարդկանց խորհրդանշող մարդկային ֆիգուրներ են պատկերված:
Հարթաքանդակի վրա տարբեր լեզուներով մեկ բառ է գրված` «հիշիր»: Հարթաքանդակը կլրացնեն գրանիտե կոմպոզիցիաները, իսկ հրապարակում կամուրջ կկառուցվի բռնադատվածների կալանավայրերի քարերից:
Հուշարձանի ստեղծման մրցույթի հաղթողի անունը հայտարարվել էր դեռ 2015 թվականի հոկտեմբերին: Հուշարձանն առաջարկել էին կառուցել ռուսական իրավապաշտպան կազմակերպությունները, և նախաձեռնությունը ստացել էր Վլադիմիր Պուտինի աջակցությունը քաղաքացիական հասարակության և մարդու իրավունքների զարգացման ՌԴ նախագահին կից խորհրդի նիստում:
Հուշարձանի նախագիծը ներկայացվել է 2016 թվականի դեկտեմբերին Նալչիկում և հասարակական մեծ արձագանք է ստացել: Հանրապետության բնակիչները հավանություն են տվել «Վշտի պատ» համազգային հուշարձանի գաղափարին` հայտնելով բռնաճնշված ժողովուրդների, այդ թվում` բալկարցիների հիշատակը հավերժացնելու անհրաժեշտության մասին:
