ԵՐԵՎԱՆ, 18 նոյեմբերի — Sputnik. Հայաստանի և Ադրբեջանի նախագահների միջև ուղիղ հեռախոսակապը կարող է դրական անդրադառնալ տարածաշրջանի խաղաղության պահպանման գործում։ Այս մասին Sputnik Արմենիային ասաց Ազգային ժողովի արտաքին հարաբերությունների հանձնաժողովի նախագահ Արտակ Զաքարյանը։
Ավելի վաղ Sputnik Արմենիային տված հարցազրույցում Հայաստանի նախագահը հայտարարել էր, որ հանդես է գալիս Բաքվի և Երևանի միջև թեժ գիծ ստեղծելու նախաձեռնությամբ՝ Լեռնային Ղարաբաղում տեղի ունեցող իրադարձություններին արագ արձագանքելու համար։
««Թեժ գիծ» ներդնելու գաղափարը, եթե այն իսկապես արդյունավետ լինի, կարող է հիմք դառնալ` վստահության մթնոլորտ ձևավորելու և հրադադարի ռեժիմի խախտման դեպքերը քննարկելու համար»,- ասաց Զաքարյանը։
Սակայն պատգամավորը հակված չէ հավատալ, որ ադրբեջանական կողմը կարող է այնքան ազնիվ լինել՝ ընդունելու համար բոլոր այն ապացույցները, որ հրադադարի ռեժիմը խախտվել է հենց իր կողմից։ Նրա խոսքով` ադրբեջանական զինվորները կրակում են բարձրաստիճան զինվորականների հրամանով, այլ ոչ թե իրենց ցանկությամբ։
Ու թեև ցանկալի կլիներ շփման գծում խաղաղություն պահպանելու մեխանիզմներ ունենալ, այնուհանդերձ Զաքարյանը հակված չէ նաև մտածել, որ ադրբեջանցիները դա կկիրառեն որպես տարածաշրջանում և շփման գծում լարվածությունը նվազեցնելու միջոց։
Ըստ նրա` Ադրբեջանն արտաքուստ կարող է համաձայնվել նման մեխանիզմ ստեղծելու հետ։ Սակայն Բաքուն պետք է ապացուցի դրա արդյունավետությունը, առաջին հերթին, հայկական կողմին։
«Մենք որևէ խաղաղարար նախաձեռնության, երկխոսության և կառուցողական առաջարկի դեմ չենք եղել և դեմ չենք լինելու, որովհետև մեր նպատակն է գտնել խաղաղ լուծում և հասնել երկարատև խաղաղության տարածաշրջանում»,- ասաց Զաքարյանը։
