ԵՐԵՎԱՆ, 18 նոյեմբերի — Sputnik. Երևան և Բաքու ուղիղ կապի ստեղծման համար իր համաձայնությունը պետք է տա Ադրբեջանի ղեկավարությունը, Sputnik Արմենիային ասաց ԱԺ փոխխոսնակ Էդուարդ Շարմազանովը։
Ավելի վաղ Sputnik Արմենիային տված հարցազրույցում Հայաստանի նախագահը հայտնեց, որ կողմ է Լեռնային Ղարաբաղի իրադարձություններին օպերատիվ արձագանքելու նպատակով Երևանի և Բաքվի միջև թեժ գիծ ստեղծելուն։
«Արդյո՞ք ռեալ է այդ թեժ գծի ստեղծումը՝ կախված է Ադրբեջանի նախագահից։ Մեր նախագահը հստակ նշել է ազդակները։ Ավելին, նա ասել է, որ նման օրինակներ եղել են 90-ականներին, երբ նա պաշտպանության նախարար է եղել և կապ է ունեցել իր գործընկերոջ հետ։ Սա հրաշալի օրինակ է»,- ասաց Շարմազանովը։
Նրա խոսքով` Սարգսյանը ցույց տվեց, որ տարածաշրջանում խաղաղության է ձգտում, ի տարբերություն Ալիևի, հստակ քայլեր է առաջարկում այդ ուղղությամբ։
«Այժմ գնդակը Ադրբեջանի խաղադաշտում է։ Ալիևը քաղաքական կամք պետք է դրսևորի դրա համար»,- նշեց Շարմազանովը։
Փոխխոսնակի կարծիքով, շատ կարևոր է անձնական կապեր ստեղծել երկու պետությունների ղեկավարների միջև։ Ինչ վերաբերում է նախագահների հավանական հանդիպմանը, ապա, Շարմազանովի խոսքով, Սարգսյանը հայտնել է իր պատրաստակամությունը։ Իսկ հանդիպման կազմակերպումը գտնվում է ԵԱՀԿ ՄԽ համանախագահների իրավասության շրջանակներում։
