Sputnik.Կարծիք հարցման տվյալների համաձայն` ամերիկացիների մեծ մասը (80%) կարծում է, որ ԶԼՄ-ները ԱՄՆ նախագահական ընտրությունները լուսաբանելու ժամանակ ոչ օբյեկտիվ են եղել թեկնածուներից մեկի նկատմամբ։
«ԱՄՆ-ում կան թե՛ դեմոկրատական, թե հանրապետական կուսակցության ազդեցության տակ գտնվող լրատվամիջոցներ, այդ առումով ակնհայտ էր, որ պետք է լիներ նման մոտեցում. յուրաքանչյուր կուսակցության ազդեցության տակ գտնվող լրատվամիջոցն աջակցում էր իրենց թեկնածուին։ Հիմնականում այդպես էր։ Սակայն կային դեպքեր, երբ հանրապետականների ազդեցության տակ գտնվող ԶԼՄ-ներն ավելի շատ լուսաբանում էին Հիլարի Քլինթոնին, քան իրենց թեկնածուին»,- նշում է Սուրեն Սարգսյանը։
Նրա խոսքով` ԱՄՆ-ի առաջատար լրատվամիջոցներից մեկը` CNN-ը, ակնհայտ աջակցում էր Քլինթոնին, նույնիսկ ծաղրում էին Դոնալդ Թրամփին, հարցազրույցներ էին վերցնում այնպիսի գործիչներից, որոնք ասում էին, թե նա նախագահ դառնալու հնարավորություն չունի։
Փաստն այն է, որ լրատվամիջոցները մասսայական տպավորություն էին ստեղծել, որ Հիլարի Քլինթոնի հաղթանակն ակնհայտ է։ Նույնիսկ ընտրություններից երկու օր առաջ տեղեկություն տարածվեց, որ նրա հաղթելու հավանականությունը ավելի քան 90 տոկոս է կազմում։
«Այսինքն ուղղորոդում էին հանրությանը, իսկ հանրությունն էլ ցույց տվեց, որ իրենց ուղղորդել հնարավոր չէ, Թրամփի հաղթանակը դրա վառ ապացույցն էր»,- նշեց Սարգսյանը։
