ԵՐԵՎԱՆ, 18 նոյեմբերի — Sputnik, Լաուրա Սարգսյան. Գիտության և մշակույթի ռուսական կենտրոնը հագեցած էր ռուսական հեքիաթի ոգով։ Նման մթնոլորտի «պատճառը» Ռուդնև եղբայրների ցուցահանդեսն էր, որը կտևի երկու օր։
«Ավելի հետաքրքիր բան չկա, քան գրական ստեղծագործություն նկարազարդելը։ Մենք` նկարիչներս, տեքստը վերածել ենք կերպարվեստի»,- Sputnik Արմենիայի թղթակցի հետ զրույցում ասաց նկարիչ Անդրեյ Ռուդնևը։
Երևանյան հանդիսատեսին ներկայացված աշխատանքները թեմատիկ առումով երեք մասի էին բաժանված` ռուսական հեքիաթներ, աստվածաշնչյան թեմա և ազատ ոճի ստեղծագործություններ, որոնք ներկայացնում էին նկարիչների անձնական աշխարհընկալումը։
Ռուսական հեքիաթներից աչք էր զարնում Ալեքսանդր Պուշկինի «Ռուսլան և Լյուդմիլա» ստեղծագործությունը, սակայն առանձնահատուկ տեղ էին զբաղեցնում աստվածաշնչյան թեմաներ շոշափող աշխատանքները` Քրիստոսի խաչելությունը, մարդկության առաջին մեղքը… Աստվածաշնչյան թեմայի հանդեպ եղբայրները հատուկ վերաբերմունք ունեն։
«Աստվածայինը շոշափելը գերագույն հաճույք է մարդու համար։ Եթե պիտի նկարես, ապա ավելի լավ է` միայն նման ստեղծագործություններ նկարես»,- ասաց Անդրեյը։
Եղբայրները Երևան են բերել շուրջ 30 աշխատանք։ Նրանք ստեղծագործում են տարբեր ժանրերում, ստեղծում են մոնումենտալ ստեղծագործություններ, նկարազարդումներ են անում պատերի վրա, ուսումնասիրում են նկարչության ժամանակակից ուղղությունները` 3D և այլն։
Ռուդնևները երկվորյակ եղբայրներ են, նկարում են երեք տարեկանից։ Միխայիլ Ռուդնևի առաջին «գեղարվեստական աշխատանքը» թղթի վրա նկարված արծիվն է եղել. Հենց այդ ժամանակ է պարզ դարձել, որ եղբայրները նկարիչներ են դառնալու։ Այդ ժամանակից ի վեր Ռուդնևները ծառայում են արվեստին։
