ԵՐԵՎԱՆ, 18 նոյեմբերի — Sputnik. Կինոյում երկար տարիների իր լռության պատճառը կինոռեժիսոր Արտավազդ Փելեշյանն այսպես է մեկնաբանել. «Սցենարներ միշտ ունեմ, բայց դրանց էկրանավորման համար փող չկա։ «Հոմո սափիենս» ֆիլմի սցենարն արդեն քանի տասնամյակ պատրաստ է, բայց այդպես էլ ֆիլմ չի դառնում՝ ֆինանսների բացակայության պատճառով»։
Մշակույթի նախարար Արմեն Ամիրյանի հետ հանդիպման ժամանակ քննարկվել են վարպետի կինոծրագրերը՝ երկար լռությունից հետո: Քննարկվել է նաև ռեժիսորի նոր՝ «Իմ տիեզերքը» (վերնագիրը՝ առայժմ պայմանական) գիրքը հրատարակելու հարցը:
Հայաստանում գտնվելու ընթացքում Արտավազդ Փելեշյանը վարպետության դաս կանցկացնի Երևանի կինոյի և թատրոնի պետական ինստիտուտում: Կմասնակցի Հանրային հեռուստաընկերության հիմնադրման 60 և Հակոբ Պարոնյանի անվան երաժշտական կոմեդիայի պետական թատրոնի 75-ամյակին նվիրված հոբելյանական միջոցառումներին:
