ԵՐԵՎԱՆ, 18 նոյեմբերի — Sputnik. ԱՄՆ-ում նախընտրական գործընթացի ամենակարևոր գործոնը ոչ թե ԶԼՄ-ների լուսաբանումն է, այլ թեկնածուների նախընտրական ճառերը, Sputnik Արմենիային ասաց Ազգային ժողովի արտաքին հարաբերությունների մշտական հանձնաժողովի նախագահ Արտակ Զաքարյանը։
Sputnik.Կարծիք հարցման տվյալների համաձայն` ամերիկացիների մեծ մասը (80%) կարծում է, որ ԶԼՄ-ները ԱՄՆ նախագահական ընտրությունները լուսաբանելու ժամանակ ոչ օբյեկտիվ են եղել թեկնածուներից մեկի նկատմամբ։
Ընդ որում` ամերիկացիների կեսից ավելին (59%) պատասխանել է, որ կողմնակալ են եղել ինչպես տեղական, այնպես էլ ազգային ԶԼՄ-ները։ Հարցումն անցկացրել է ԱՄՆ-ում TNS UK հետազոտական ընկերությունը Sputnik տեղեկատվական գործակալության և ռադիոյի համար։
«Ես հետևել եմ ընտրություններին, սակայն ԶԼՄ-ների մոնիտորինգ չեմ կատարել, քանի որ դրա կարիքը չկար։ Ինձ հետաքրքրել են պատգամավորների նախընտրական ելույթները, նրանց ծրագիրը` որպես հետագա արտաքին քաղաքականության հիմք»,- ասաց Զաքարյանը։
Նա հույս հայտնեց, որ Թրամփը ջանքեր կգործադրի ամբողջ աշխարհում հակամարտության օջախներում երկխոսություն հաստատելու համար։ Նրա կարծիքով` դա շատ կարևոր է, քանի որ ԱՄՆ-ի դերն ամբողջ աշխարհում շատ մեծ է, չի կարելի այն թերագնահատել։
«Անձամբ ինձ համար շատ կարևոր է, թե ինչպիսի արտաքին քաղաքականություն կիրականացնի նորանշանակ նախագահը»,- ասաց Զաքարյանը։
Պատգամավորը նշեց, որ Հայաստանի համար ԱՄՆ-ը յուրահատուկ դեր է խաղում, քանի որ մտնում է ԵԱՀԿ Մինսկի խմբի մեջ։
