ԵՐԵՎԱՆ, 16 նոյեմբերի — Sputnik. Աժ-ի պատգամավորներն այսօր, շարունակելով քննարկել զոհված և հաշմանդամ ազատամարտիկների ընտանիքներին աջակցելու նպատակով հիմնադրամ ստեղծելու կառավարության նախաձեռնությունը, շարունակեցին նաև բուռն ելույթներն ու միմյանց ուղղված մեղադրանքները: Եթե ընդդիմադիր պատգամավորներն իշխանականներին մեղադրում են երկրում և բանակում ծաղկող կոռուպցիան չվերացնելու համար, ապա իշխանականները, փոխադարձաբար, բարձրաձայնում են ազգային տուրքի գաղափարը նսեմացնելու մեղարդանքներ:
ԱԺ փոխնագահ Հերմինե Նաղդալյանը կառավարության նախաձեռնությունն անվանեց ազգային տուրք` հիշեցնելով, որ այն դարեր ի վեր կիրառվել է Հայաստանում` երկրի համար դժվարին ժամանակներում:
ԱԺ ՕԵԿ խմբակցության պատգամավոր Մհեր Շահգելդանն էլ հայտարարեց, որ գաղափարն ընդունելի է, նախագիծը` կարևոր:
«Մեն բոլորս ցանկանում են պաշտպանել զինվորին: Հասկանալի է, որ բյուջեի պակասուրդն ու բազմաթիվ այլ խնդիրներ թույլ չեն տալիս, որպեսզի պետությունն իր վրա վերցնի այդ պարտականությունը և դիմում է ժողզովրդի օգնությանը»,- ասաց նա, բայցև, միաժամանակ, հարցադրում հնչեցնելով,- «Իսկ ինչու չկա բավականաչափ գումար բյուջեում»:
Պատգամավորը տվեց նաև պատասխանը` կոռուպցիա, անհարկի ծախսեր, ճոխ ծառայողական ավտոմեքենաներ, անհասկանալի միջոցառումներ, որոնց վրա ծախսված գումարները կարող էին ուղղվել բանակին ու զինվորին:
Ինչ վերաբերում է հիմնադրամին, Մհեր Շահգելդյանն առաջարկեց դրա հաշվեհամարին այսուհետև փոխանցել նաև կարմիր գծերից, արագաչափերից ու տեսանկարահանող սարքերից հավաված գումարները:
Պատգամավոր Ռուբեն Հակոբյանն էլ առաջարկեց ցածր աշխատավարձ` մինչև 100 000 դրամ, ստացողներին ազատել այս նոր հարկատեսակից, իսկ ավելի բարձր աշխատավարձի դեպքում` ավելացնել:
«Ես չեմ կարծում, որ 1 մլն աշխատավարձ ստացողի համար դժվար կլինի 4000 դրամ վճարելը»,- ասաց նա:
