ԵՐԵՎԱՆ, 9 նոյեմբերի — Sputnik. Ինֆորմացիոն տեխնոլոգիաների ձեռնարկությունների միության փոխտնօրեն Հայկ Չոբանյանը Sputik Արմենիայի վստահեցրեց, որ վարչապետի հանձնարարականը կատարված է և ՏՏ ոլորտում աշխարհը շրջելու ծրագիրը գտնված է:
Խոսքը 2014թ-ից Հայաստանում մեկնարկած «Արմաթ» ինժեներական լաբորատորիաների ծրագրի մասին է, որի շնորհիվ հայաստանյան ամենահեռավոր ու սահմանային գյուղերում բնակվող երեխաներն անգամ ինժեներական խմբակներ հաճախելու հնարավորություն են ստացել: Խմբակների գործունեության 2 տարվա ընթացքում պատանի ինժեներներն արդեն միջազգային ճանաչման արժանացած համակարգչային հավելվածներ, 3D տպիչներ ու տարատեսակ ռոբոտներ են ստեղծել:
Այսօր Հայաստանում 162 խմբակ է գործում, որտեղ շուրջ 3000 երեխա է հաճախում:
«2019թ-ին, եթե մեր պլանավորածով շարժվենք, մենք կունենանք ոչ միայն 1200 լաբորատորիաները ՀՀ տարածում, այլև` բավականին հետաքրքիր ցուցանիշներ, և կարող ենք խոսել արդեն ոչ թե կանխատեսմամբ, այլ` որպես իրականություն: Եվ կշրջենք աշխարհը՚,- ասաց Հայկ Չոբանյանը:
Իսկ աշխարհը շրջելու համար հայաստանյան ծրագիրը պետք է իրականացնի իր առջև դրված նպատակները. մինչև 2022թ-ը Հայաստանում 70 000 երեխա պետք է ներգրավված լինի ինժեներական կրթության մեջ՝ ապահովելով տարեկան շուրջ 50 000 շրջանավարտների, որոնց մեծ մասը բուհն ավարտելուց հետո պետք է աշխատի տեխնոլոգիական արտադրության ոլորտում:
Համեմատության համար ասենք, որ այսօր տարեկան 1800 շրջանավարտներից միայն կեսն է աշխատանք գտնում իր մասնագիտությամբ: Մյուսները կա՛մ չեն աշխատում, կա՛մ աշխատում են միայն որոշակի վերապատրաստում անցնելուց հետո:
Ի դեպ, 2019թ-ին ՀՀ-ում նախատեսվում է անցկացնել ՏՏ համաշխարհային կոնգրես, որի ժամանակ Հայաստան են ժամանելու այդ ոլորտի համաշխարհային առաջնորդները՝ տեսնելու, թե մեր երկիրը ինչ ունի ներկայացնելու աշխարհին:
Հայկ Չոբանյանը վստահ է, որ աշխարհին ներկայացնելու լավագույն ծրագիրը հենց դպրոցական լաբորատոր խմբակների զարգացման ծրագիրն է, որն էլ 2019թ-ին արդեն հավասարազոր է լինելու աշխարհը շրջելուն:
Ծրագիրն այդ հավակնությամբ արդեն իսկ ներկայացվել է վարչապետ Կարեն Կարապետյանին և հաջորդ շաբաթ ևս մեկ անգամ կքննարկվի գործադրի ղեկավարի հետ:
Հիշեցնենք, նոյեմբերի 3-ին ՀՀ վարչապետ Կարեն Կարապետյանը տեղեկատվական և հեռահաղորդակցության տեխնոլոգիաների ոլորտի զարգացման հեռանկարներին նվիրված խորհրդակցություն էր հրավիրել, որի ժամանակ պահանջել էր ներկայացնել այնպիսի բեկումնային, երկարաժամկետ զարգացման ծրագիր, որը «շուռ կտա աշխարհը»:
