ԵՐԵՎԱՆ, 14 նոյեմբերի — Sputnik. Շաքարային դիաբետն աշխարհում ամենատարածված հիվանդությունների շարքում է։ Ամեն տարի դիաբետով հիվանդ մարդկանց թիվն աճում է։
Առողջապահության համաշխարհային կազմակերպության տվյալներով` դեռ 1980թ-ին աշխարհում եղել է 2-րդ տիպի շաքարային դիաբետով հիվանդ 108 միլիոն մարդ, 2009թ.-ին` 225 միլիոն, իսկ 2014 թ.-ին` 442 մարդ։ Այսինքն, դիաբետով հիվանդների թիվը 34 տարում աճել է 4 անգամ։
«Հաղթենք դիաբետը միասին» հիմնադրամի տնօրեն Խանդութ Հովհաննիսյանը Sputnik Արմենիա միջազգային մամուլի կենտրոնում նշեց, որ Դիաբետի դեմ պայքարի համաշխարհային օրվա նպատակը հասարակության ուշադրության գրավելն է այդ հարցի նկատմամբ, պետական և ոչ պետական կառույցների ջանքերի միավորումը տարբեր ծրագրեր մշակելու համար` ուղղված շաքարային դիաբետի արդյունավետ բուժմանը։
«Շատ կարևոր է դիաբետը վաղ փուլում բացահայտելը` հիվանդության նկատմամբ ճիշտ հսկողություն սահմանելու համար։ Մեկ տարի առաջ մեկնարկել է «Վերահսկիր դիաբետը, ապրիր լիարժեք կյանքով» ծրագիրը, որի նպատակն է Հայաստանում միջազգային փորձի կիրառումը։ Մենք զբաղվում ենք դիաբետի 1-ին կարգի հիվանդ 0-23 տարեկան երեխաներով և երիտասարդներով», — ասաց Հովհաննիսյանը։
Նրա խոսքով` ծրագրի շրջանակում տրամադրվել են ինսուլինային գրիչներ, տարին երկու անգամ իրականացվում է գլիկոլիզացված հեմոգլոբինի ստուգում։
Բացի այդ, նա հավելեց, որ Հայաստանում գործում է դիաբետի չորս դպրոց, որոնք գործում են տարբեր հիվանդանոցներին և կլինիկաներին կից։ Այստեղ աշխատում են բժիշկ էնդոկրինոլոգներ, որոնք հատուկ նախապատրաստում են անցել։
«Դպրոցում պարապմունքների ժամանակ օգտագործվում է Դիաբետի միջազգային ֆեդերացիայի կողմից հաստատված գրականություն»,- ասաց Հովհաննիսյանը։
Մոր և մանկան ավստրիական հիվանդանոցի բժիշկ էնդոկրինոլոգ Գայանե Պետրոսյանը նշեց, որ պարապմունքների ընթացքում օգտագործվող գրականությունն օգնում է դիաբետով հիվանդ մարդկանց, որոնք անձամբ կարող են որոշել, թե իրենց ինչ է անհրաժեշտ։
«Բժշկի պրոֆեսիոնալիզմը բավարար չէ հիվանդներին անհրաժեշտ օգնություն ցուցաբերելու համար։ Այս առումով շատ կարևոր է, որպեսզի բժիշկը լինի մանկաբույժ, որը թույլ կտա կապ հաստատել բժշկի և փոքրիկ այցելուների միջև։ Ուսուցման ընթացքում բժիշկը պետք է վստահ լինի, որ իր հիվանդը լիովին հասկացել է այդ հիվանդությանը վերաբերող դետալները։ Բուժաշխատողը պետք է ամեն ինչ մատչելի լեզվով մատուցի»,- ասաց Պետրոսյանը։
Բժիշկը նշեց, որ հիվանդոցին կից գործում են փոքր դասարաններ, որոնք պարապմունքներ են անցկացնում։
«Շատ կարևոր է, որպեսզի այդ դասարանները չհիշեցնեն հիվանդանոցային պայմաններ։ Այդ ամենն արվում է նրա համար, որպեսզի դասերն ինտերակտիվ անցկացվեն։ Մեր խնդիրն է՝ այնպես անել, որպեսզի հիվանդները չհոգնեն և ակտիվ մասնակցեն այդ գործընթացին։ Մեզ համար կարևոր են հիվանդների առողջական վիճակի դրական փոփոխությունները։ Դա, անկասկած, անդրադառնում է նրանց տրամադրության և վարքագծի վրա»,- ասաց նա։
Հայաստանում առաջին տարին չէ, որ կազմակերպվում են Դիաբետի դեմ համաշխարհային պայքարին նվիրված միջոցառումներ։ Նոյեմբերի 14-ին «Երևան մոլ» առևտրի կենտրոնում տեղի կունենա հերթական ակցիան Դիաբետի դեմ պայքարի համաշխարհային օրվա շրջանակում։
Առողջապահության նախարարության տվյալներով` 2015թ-ի դրությամբ Հայստանում կա 77 087 գրանցված դիաբետով հիվանդ։ 2015 թ.-ին գրանցվել է դիաբետի 8709 նոր դեպք և այդ հիվանդության պատճառով՝ մահվան 801 դեպք։
