ԵՐԵՎԱՆ, հուլիսի 22– Sputnik. Հայաստանում առաջին կարգի շաքարային դիաբետով հիվանդների առողջական վիճակի և կյանքի որակի բարելավմանն ուղղված քայլեր կձեռնարկվեն, չորեքշաբթի լրագրողներին ասաց Առողջապահության նախարարության երեխաների առողջության պահպանման բաժնի ղեկավար Նունե Փաշայանը։
1-ին կարգի շաքարային դիաբետը տարածված է երեխաների և երիտասարդների շրջանում, և հիվանդության առկայության դեպքում մարդու օրգանիզմում ինսուլինն իսպառ բացակայում է, ինչը պայմանավորված է ենթաստամոքսային գեղձի աշխատանքի խանգարումով։
Հայաստանի կառավարությունը հուլիսի 16-ին որոշում է կայացրել 2015-2019 թվականներին «Էլայ Լիլի և Քամփնի» ամերիկյան կազմակերպությունից երեխաների համար ինսուլին գնելու մասին։ Այդ դեղամիջոցները կարելի է շաքարային դիաբետով հիվանդ երեխաներին ներարկել անմիջապես հագուստի վրայից։ Բացի այդ, ներարկումից առաջ սնունդ ընդունելու կարիք չի լինի։
Առաջիկա 5 տարվա ընթացքում հանրապետությունում կիրականացվի «Վերահսկի՛ր դիաբետը, ապրի՛ր լիարժեք կյանքով» միջոցառումների ծրագիր, որի շահառուներն են առաջին տիպի շաքարային դիաբետ ունեցող 0-ից 18 տարեկան երեխաները և 18-ից 22 տարեկան երիտասարդները:
Փաշայանի խոսքով` ծրագրի շրջանակում ցուցաբերված օգնությունը ուղղված կլինի նրանց կյանքի որակի բարելավմանը։
«Առաջին հերթին ձեռք կբերվի ինսուլինի անալոգներ, որոնք առավելագույնս մոտեցված կլինեն մարդու օրգանիզմում արտադրվող ֆիզիոլոգիական ինսուլինին», – ասաց Փաշայանը։
Նա նշեց, որ ինսուլինի անալոգները թույլ կտան կարգավորել երեխայի սննդակարգը, այսինքն` ներարկումը կապված չի լինի սննդի ընդունման հետ։
«Ծրագրի շրջանակում բոլորին կտրամադրվեն հատուկ ինսուլինային գրիչներ ավանդական ներարկիչների փոխարեն։ Երեխաները հիմնականում վախենում են ներարկիչներից, իսկ հատուկ գրիչները կօգնեն հաղթահարել այդ վախը», – նշեց Փաշայանը։
Նա հայտնեց, որ այդ ծրագրի շրջանակում Հայաստանում կբացվեն շաքարային դիաբետի չորս հատուկ կենտրոններ և դպրոցներ` շաքարային դիաբետով հիվանդ երեխաների համար (մասնավորապես` Երևանում և Գյումրիում), որտեղ հիվանդ երեխաներն ու նրանց ծնողները կկարողանան անհրաժեշտ տեղեկատվություն ստանալ իրենց հիվանդության մասին։
«Բոլոր կենտրոնները վերանորոգված կլինեն, կահավորված կլինեն նորագույն անալիզատորներով։ Կստեղծվի հատուկ տվյալների բազա շաքարախտով հիվանդ երեխաների գրանցման համար», – նշեց Փաշայանը։
Հայաստանի առողջապահության նախարարության տվյալով` այսօրվա դրությամբ հանրապետությունում գրանցված է շաքարային դիաբետով հիվանդ շուրջ 80 հազար մարդ, որոնցից 450–ը երեխաներ են, իսկ 177–ը` 18-23 տարեկան երիտասարդներ։
