ԵՐԵՎԱՆ, 13 նոյեմբերի — Sputnik, Նելլի Դանիելյան. «Երեւան ջուր»-ը սկսում է Երևանի մասնավոր տներով կառուցապատված թաղամասերի հին ջրագծերը նորերով փոխարինելու ծրագիրը: Այդ մասին Sputnik Արմենիային հայտնեց ընկերության մամուլի խոսնակ Մուրադ Սարգսյանը:
«Բակերում կկառուցենք նոր դիտահորեր, կտեղադրենք նոր ջրաչափեր, ամբողջը՝ «Երեւան ջրի» միջոցներով: Բնակիչներից մենք գումար չենք պահանջելու»,-ասաց Մուրադ Սարգսյանը:
Ծրագրի իրականացումը յուրաքանչյուր բնակչի հաշվով կարժենա 80-100 հազար դրամ: «Երեւան ջուր»-ը խոստանում է սեփական միջոցներով շտկել նաև շինարարական աշխատանքների հետևանքով վնասված ասֆալտը փողոցներում և բակերում:
«Այս աշխատանքների արդյունքում այդ թաղամասերի բնակիչները կունենան շատ ավելի բարձր որակի ջուր, շուրջօրյա ջրամատակարարում և ջրի բարձր ճնշում՝ ի տարբերություն ներկայի»- ասաց Մուրադ Սարգսյանը՝ հավելելով, որ կորուստների հիմնական ծավալն այսօր բաժին է ընկնում հենց այդ թաղամասերին:
Այդ ծրագրից շահում է նաև «Երեւան ջուր»-ը, քանի որ կուրուստների նվազեցումը ենթադրում է նաև ծախսերի կրճատում ու շահույթի աճ:
«Երբ մի փողոցում ավարտենք աշխատանքները, հին խողովակներն ապամոնտաժենք ու փոխարինենք նորերով, այն անմիջապես կտա տեսանելի արդյունք. ջրի որակն ու ճնշումն անմիջապես կբարձրանան, կորուստները կնվազեն, չարաշահումներն էլ կվերանան»,- ասաց «Երեւան ջրի» մամուլի խոսնակը:
Ծրագրի աբողջական արժեքը 21 մլն դոլար է: Այդ գումարն ընկերությունը ստացել է 7-ական մլն դոլարանոց 2 վարկային և 1 դրամաշնորհային ծրագրերից:
Նշենք, որ «Երեւան ջրի» կորուստներն այսօր 72 տոկոս են կազմում: 2006-2016 թվականներին Երևանը սնող աղբյուրներից մատակարարվող ջրի ծավալը նվազել է 23 տոկոսով, ինչը ևս ընկերությունում գնահատում են որպես կորուստների կրճատման ապացույց:
