Լաուրա Սարգսյան, Sputnik.
Ամեն շաբաթ Շառլ դը Գոլի անվան օդանավակայանից «Զվարթնոց» միջազգային օդանավակայանում վայրէջք է կատարում «Էյր Ֆրանս» ֆրանսիական ավիաընկերության ինքնաթիռը:
Ավիաընկերությունը նոր չէ, և գոյության ընթացքում արդեն հասցրել է ներկայանալ աշխարհին, այդ թվում՝ ինքնաթիռում մատուցվող բարձրակարգ սննդով:
Ահա արդեն 10 տարի Երևան-Փարիզ, Երևան-Մոսկվա և այլ ուղղությունների չվերթերի ինքնաթիռներում մատուցվող սնունդը տրամադրում է «Ավիա սերվիս» ՓԲԸ-ն: Ընկերության համար սա բարձրագույն վարպետության հայտ է:
Պատրաստված է Հայաստանում
«Ավիա սերվիսի» անձնակազմը ջանասիրաբար աշխատում է խոհանոցում, որը գտնվում է Երևանի օդանավակայանի տարածքում: Լսվում է հունցող մեքենաների աղմուկը, որոնք խմոր են պատրաստում կեքսերի, բրաունիների համար, որոնք մատուցվում են ինքնաթիռում: Օդանավակայանի խոհանոցը մեծ շենք է՝ բազմաթիվ բաժիններով, որոնք միմյանցից առանձնացված են երկար միջանցքներով: Այստեղ ոչ ոքի առանց խալաթի ներս չեն թողնում:
Այդ տարածքում աշխատանքային օրը երբեք չի սկսվում և երբեք չի ավարտվում, քանի որ աշխատանքը տևում է օրական 24 ժամ` շաբաթը յոթ օր: Աշխատում են չորս հերթափոխով:
«Ավիա սերվիս» ՓԲԸ-ի պետի տեղակալ Գագիկ Մանուկյանը երկար տարիներ աշխատում է ընկերությունում: Նա մշտապես համեմատում է սննդամթերքի արտադրամասի այսօրվա ծանրաբեռնվածությունը նախորդ տարիների հետ, երբ աշխատում էր ազգային ավիափոխադրողը:
«Նախկինում պատվերները մի քանի անգամ ավելի շատ էին, հետևաբար աշխատանքը՝ նույնպես: Հուսով ենք, որ նման իրավիճակը երկար չի տևի, և շուտով մենք կաշխատենք նախկին ռեժիմով», — Sputnik Արմենիայի թղթակցի հետ զրույցում ասաց Մանուկյանը:
Մինչ Մանուկյանը բողոքում էր աշխատանքի փոքր ծավալից, հաստատության աշխատողները կեքսեր էին թխում, մրգերը լվանում, տաք ու սառը ուտեստներ պատրաստում տարբեր ավիաուղիների համար:
![«Ավիա սերվիս» ՓԲԸ-ն սնունդ է տրամադրում «Էյր Ֆրանսին» «Ավիա սերվիս» ՓԲԸ-ն սնունդ է տրամադրում «Էյր Ֆրանսին» - Sputnik Արմենիա](https://cdn.am.sputniknews.ru/img/545/81/5458186_0:5:1497:946_600x0_80_0_0_b7eb6cea088b108f5d0e953afcf8ee70.jpg)
![«Ավիա սերվիս» ՓԲԸ-ն սնունդ է տրամադրում «Էյր Ֆրանսին» «Ավիա սերվիս» ՓԲԸ-ն սնունդ է տրամադրում «Էյր Ֆրանսին» - Sputnik Արմենիա](https://cdn.am.sputniknews.ru/img/545/81/5458128_0:0:1511:948_600x0_80_0_0_e3f32efa07081168c3c72ab5f336504b.jpg)
![«Ավիա սերվիս» ՓԲԸ-ն սնունդ է տրամադրում «Էյր Ֆրանսին» «Ավիա սերվիս» ՓԲԸ-ն սնունդ է տրամադրում «Էյր Ֆրանսին» - Sputnik Արմենիա](https://cdn.am.sputniknews.ru/img/545/80/5458069_0:0:1497:940_600x0_80_0_0_9bdbe5cce495e5d72ec9f6ce7a89349c.jpg)
![«Ավիա սերվիս» ՓԲԸ-ն սնունդ է տրամադրում «Էյր Ֆրանսին» «Ավիա սերվիս» ՓԲԸ-ն սնունդ է տրամադրում «Էյր Ֆրանսին» - Sputnik Արմենիա](https://cdn.am.sputniknews.ru/img/545/78/5457828_0:0:1413:888_600x0_80_0_0_d06b3b46733c4c89459c24e0e608e012.jpg)
![«Ավիա սերվիս» ՓԲԸ-ն սնունդ է տրամադրում «Էյր Ֆրանսին» «Ավիա սերվիս» ՓԲԸ-ն սնունդ է տրամադրում «Էյր Ֆրանսին» - Sputnik Արմենիա](https://cdn.am.sputniknews.ru/img/545/80/5458012_0:0:1497:940_600x0_80_0_0_59b8e6e44482fdd48e9855d40ae2e510.jpg)
Այստեղ ամեն ինչ պետք է համապատասխանի միջազգային չափանիշներին, նույնիսկ մրգերը կտրատելը: Խոհանոցի գոտիներից մեկում 50-ամյա կինը խնամքով լվանում էր արքայանարինջը` տեղադրելով այն փոքրիկ քառակուսի տուփի մեջ՝ կարմիր խնձորի կողքին:
«Մենք որակյալ ենք կատարում մեր աշխատանքը, այլապես մեզ մոտ ուտելիք չէր պատվիրի նշանավոր «Էյր Ֆրանսը»», — հպարտությամբ նշեց Մանուկյանը:
Որպես ապացույց՝ նա ցույց տվեց պատվոգրերը, որոնք ստացել է ընկերությունը տարբեր ավիաընկերությունների հետ աշխատանքի տարիներին: Դրանց թվում է նաև Ռուսաստանի նախագահ Վլադիմիր Պուտինի ստորագրությամբ պատվոգիրը:
![Диплом компании ЗАО Авиа-сервис, которая поставляет бортовое питание на лайнер французской авиакомпании Эйр Франс Диплом компании ЗАО Авиа-сервис, которая поставляет бортовое питание на лайнер французской авиакомпании Эйр Франс - Sputnik Արմենիա](https://cdn.am.sputniknews.ru/img/545/83/5458317_0:0:1500:1000_600x0_80_0_0_cb4c3a92d0021a9d5f0f91d4989661a0.jpg)
Բիզնես VS Էկոնոմ
Մինչ մենք զրուցում էինք, մի քանի փաթեթ բերեցին` տաք և սառը կերակրատեսակներով: Ձիթապտղով, կանաչիով և ձկով աղցանը նախատեսված էր ավիաուղիներից մեկի բիզնես կարգի համար, իսկ պանրի և մսի տեսականին՝ հացի կտորներով և փոքր կեքսով, էկոնոմ դասի համար:
«Էկոնոմ և բիզնես կարգերի միջև խիստ բաժանում չկա, քանի որ այն, ինչ պատրաստել ենք էկոնոմ կարգի համար, որոշ ավիաուղիներ մատուցում են բիզնես կարգում»,- նշեց Մանուկյանը:
Ինքնաթիռում մատուցվող ուտելիքի հետ պարտադիր մատուցվում է աղ, շաքար, պղպեղ, միանգամյա օգտագործման պատառաքաղ, գդալ և դանակ, հաց, կարագ, ջեմ, չոր և թաց անձեռոցիկներ:
«Անկախ մարդու ցանկությունից՝ մենք տուփի մեջ դնում ենք նաև թեյի և սուրճի փաթեթներ», — նշեց Մանուկյանը:
Բիզնես կարգի տարբերությունը ոչ միայն այն է, որ մարդը նստում է առջևում և մյուսներից բաժանված է պատնեշով, այլև այն, որ տարբեր է մենյուի և ընտրության հնարավորությունը: Մանուկյանը հպարտանում է, որ իրենց ընկերությունը սպասարկում է գրեթե բոլոր ավիաուղիներին, որոնք թռչում են Երևան՝ ֆրանսիական, ռուսական և այլն:
Մինչ մենք զրուցում էինք, հաստատության աշխատակիցները սուրճ պատրաստեցին և հյուրասիրեցին բրաունի: Սննդամթերքի բաժնի 113 աշխատողներն իրենց գործի իսկական վարպետն են: