Լաուրա Սարգսյան, Sputnik.
Ուղեբեռը ստանալը հաջող ուղևորության եզրափակիչ փուլն է, ուստի ճամպրուկի կամ պայուսակի կորուստը կարող է փչացնել մարդու տրամադրությունը։
«Վիճակագրության համաձայն` ուղեբեռն ամենից շատ կորչում է տարանցիկ փոխադրումների ժամանակ։ Պատճառները մի քանիսն են, օրինակ, ուղևորային չվերթերի մեծ ծավալները»,- Sputnik Արմենիայի թղթակցի հետ զրույցում ասաց «Զվարթնոց» օդանավակայանի կորած և գտնված իրերի բաժնի վարիչ Գուրգեն Մանուկյանը։
Նրա խոսքով` վիճակագրություն չկա, թե քանի ուղեբեռ է գրանցում անցնում և քանիսն է կորչում։ Բայց ակնհայտ է, որ ուղեբեռի կորուստը զուտ մարդկային գործոն է։
«Ուղեբեռը կորչելու դեպքում առաջին հերթին ուղևորը պետք է դիմի մեր ծառայություն։ Դիմումը ստանալուց հետո մենք սկսում ենք որոնումը, որը տևում է մինչև հինգ օր», — նշեց Մանուկյանը։
Մեծամասամբ ուղեբեռը գտնվում է և վերադարձվում տիրոջը։ Լինում են դեպքեր, երբ դրա համար ամիսներ են պահանջվում։ Ընդհանուր առմամբ Երևանի օդանավակայանն ուղեբեռի առաքումն անվճար է իրականացնում։ Ինչպես նշեց Մանուկյանը, եթե ուղեբեռը ստացվել է բաց վիճակում կամ կոտրված փականով, ապա դա արվել է կամ անվտանգության ծառայության ներկայացուցիչների կողմից, երբ նրանք որոշակի կասկածներ ունեն, կամ ուղեբեռը վնասվել է տեղափոխման ժամանակ։
«Եթե ուղեբեռը բաց է լրացուցիչ ստուգման համար, ապա դրա մեջ պետք է անպայման նամակ լինի այն բացելու պատճառների մասին», — ասաց Մանուկյանը։
Հակառակ դեպքում անհրաժեշտ է դիմել օդանավակայանի ղեկավարությանը ուղեբեռի հետ առկա խնդիրները պարզելու համար։ Ուղևորների կողմից բողոք ստանալուց հետո կորած և գտնված իրերի ծառայությունը միջազգային համակարգով նամակ է ուղարկում ավիաընկերությանը։ Դրան հետևում է ուղևորի և ավիաընկերության միջև հարաբերությունների պարզաբանումը. որոշվում է տուգանքի չափը, որը կարող է փոխվել` կախված ավիաուղիներից։
Ուղեբեռի անհետացման պատճառներից մեկն այն է, որ այն պարզապես չեն հասցրել բեռնել ինքնաթիռ կամ պահել են լրացուցիչ ստուգման համար։ Որոշ դեպքերում բարդություններ է առաջացնում այն, որ ուղեբեռից պատահաբար պոկվել է կտրոնը։
Ծառայության ներկայացուցիչները նշեցին ուղեբեռի անհետացման ամենատարածված պատճառը` որոշ ուղևորներ, հատկապես, տարեց, սխալմամբ իրենց ուղեբեռի փոխարեն վերցնում են ուրիշինը։
Մանուկյանը խորհուրդ տվեց ավելի ուշադիր լինել սեփական իրերի նկատմամբ և միշտ համեմատել վայրէջքի կտրոնն ուղեբեռի համարի հետ։
