ԵՐԵՎԱՆ, 12 նոյեմբերի — Sputnik. Հայ սամբիստներն աշխարհի երկու առաջնություններում մեկ արծաթե և չորս բրոնզե մեդալ են նվաճել, հայտնում են Սամբոյի ֆեդերացիայից։
Բուլղարիայի Սոֆիա քաղաքում մեկնարկած սամբոյի 2016թ. աշխարհի առաջնության առաջին օրը ասպարեզ մտավ վեց հայ մարզիկ, նրանցից Ասյա Լալազարյանը (48կգ քաշային կարգ) և Տիգրան Կիրակոսյանը (52կգ քաշային կարգ) Հայաստանի համար նվաճեցին բրոնզե մեդալներ:
Ռումինիայի Պլոեշտի քաղաքում մեկնարկած սամբոյի 2016թ. աշխարհի պատանիների և երիտասարդների առաջնության մրցումային առաջին օրը Արթուր Մանուկյանը Հայաստանի համար նվաճեց առաջին մեդալը: 48 կգ քաշային կարգում հանդես եկող մեր պատանի մարզիկը, գերազանց անցկացնելով նախնական գոտեմարտերը, եզրափակչում հանդիպեց Ռուսաստանի ներկայացուցիչ Եվգենի Երյոմինի հետ ու թեև հաղթում էր գոտեմարտի առաջին հատվածում, վերջում կորցրեց զգոնությունը և արդյունքում պարտվեց: Արթուրն արժանացավ աշխարհի առաջնության արծաթե մեդալի:
Մրցումային երկրորդ օրը հայ մարզիկներից Արմեն Նիկողոսյանը Հայաստանի համար նվաճեց երկրորդ մեդալը: 52 կգ քաշային կարգում հանդես եկող պատանի մարզիկը, ակտիվ անցկացնելով նախնական գոտեմարտերը, կիսաեզրափակչում հանդիպեց Ռուսաստանի ներկայացուցիչ Ռամազան Տիկուի հետ և պարտություն կրեց: Արմենը նվաճեց աշխարհի առաջնության բրոնզե մեդալ:
Մրցումային երրորդ օրը Բորիս Շատվերյանը Հայաստանի համար նվաճեց երրորդ մեդալը: 70 կգ քաշային կարգում հանդես եկող մարզիկը կիսաեզրափակչում հանդիպեց Վրաստանիի ներկայացուցիչ Գագի Լիչելիի հետ և պարտություն կրեց: Բորիսը նվաճեց աշխարհի առաջնության բրոնզե մեդալ:
