ԵՐԵՎԱՆ, 11 նոյեմբերի – Sputnik. ՀՀ ԱԺ մարդու իրավունքների պաշտպանության և հանրային հարցերի մշտական hանձնաժողովն այսօր քննարկեց ՊՆ նոր օրինագիծը, որով կառավարությունն առաջարկում է ՀՀ աշխատող բոլոր քաղաքացիների ամսական աշխատավարձերից 1000-ական դրամ գանձել և հատկացնել մարտական գործողությունների ժամանակ զոհված կամ վիրավոր զինծառայողներին ու նրանց ընտանիքի անդամներին:
Նախագիծը ներկայացնելով՝ պաշտպանության նախարար Վիգեն Սարգսյանը նշեց, որ գանձված 1000-ական դրամները վճարվելու են հատուկ ստեղծված հիմնադրամին: Հիմնադրամը ղեկավարելու է կառավարության, ԿԲ-ի և ՀԿ-ների ներկայացուցիչներից կազմված հոգաբարձուների խորհուրդը, ունենալու է գործադիր տնօրեն և գործադիր հանձնաժողով:
Չվիճարկելով մարտական գործողությունների ժամանակ զոհված կամ վիրավորված զինծառայողներին ֆինանսական աջակցություն տրամադրելու նպատակը` ԱԺ պատգամավորները հիմնականում մտահոգություն հայտնեցին հարկահավաքության թափանցիկության վերաբերյալ:
Էդմոն Մարուքյանը նշեց, որ մինչ օրս հասարակությանը հստակ պատասխան չի տրվել, թե նախկին հիմնադրամների ու գանձված հարկերի գումարները, որոնց փոշիացման վերաբերյալ կասկածներ կան, իրականում ինչի վրա են ծախսվել:
«Արդյոք հնարավո՞ր չէ հիմնադրամը ստեղծել, բայց գումարները հավաքել ոչ թե քաղաքացիներից, այլ` կառավարության հայտարարած կրճատումների, օպտիմալացման արդյունքում խնայված գումարներից։ Ոչ թե ասենք՝ շատ լավ բան ենք անում ու էլի ձեզանից ենք հավաքում»,- ասաց Մարուքյանը:
Պաշտպանության նախարարը պատգամավորին առաջարկեց բյուջետային ծախսերի տնտեսումների և ծախսերի մասին առաջարկություններ ներկայացնել բյուջեի նախագծի քննարկման ժամանակ՝ խոստանալով առաջիկայում ներկայացնել, թե ինչի վրա են օգտագործվելու ՊՆ բյուջեի խնայված միջոցները: Բայց աշխատող քաղաքացիներից 1000-ական դրամներ չգանձելու առաջարկին չհամաձայնեց:
ՙՉեմ կարծում, թե սա կարող է փոխարինել առաջարկվող ծրագրին, քանի որ այս ծրագիրն ունի մի փոքր այլ տրամաբանություն: Սրա տրամաբանությունն է առանձնացնել և հատուկ շեշտել այն մարդկանց, ովքեր մասնակցել են պետության պաշտպանության գործին»,- ասաց Վիգեն Սարգսյանը։
Նրա խոսքով` իր խնդիրն է՝ որպես պաշպանության նախարար, որ յուրաքանչյուր քաղաքացի իր ամսական աշխատավարձը ստանալիս մի պահ մտածի այն մարդկանց, այն տղաների մասին, որոնք առաջնագծում են:
«Ես համարում եմ, որ սա կարևոր քայլ է մեր համախմբման ուղղությամբ»,- ասաց նախարարը:
Ի դեպ, պատգամավորները կարևորեցին նաև օրենքի նախագծի լայն հանրային քննարկում անցկացնելու անհրաժեշտությունը, ինչին նախարարը պատասխանեց, որ իր կարծիքով, հասարակությունն այս հարցի հանրային քննարկումն անցկացրել է ապրիլից մինչև այսօր, և ներկայացված նախագիծը ներկայացնում է հասարակության մեծ մասի կարծիքը այդ հարցի շուրջ:
Էդմոն Մարուքյանը դարձյալ ընդգծեց, որ խնդիրը հանուն բանակի ամսական 1000 դրամ վճարելու մեջ չէ:
«Մենք արդեն մեծ հարկեր ենք վճարում, և ամբողջ հարցն այն է, թե ինչու այդ խնդիրները մեր վճարած հարկերի շրջանակում չեն լուծվում»,-ասաց նա:
Նախարարը վստահեցրեց, որ պաշտպանության ոլորտին հատկացվող ծախսերն իրականացվում են իր և ՀՀ նախագահի խիստ հսկողությամբ:
