ԵՐԵՎԱՆ, 10 նոյեմբերի-Sputnik. Մարտական հերթապահության կամ մարտական պայմաններում զոհված սպաների ընտանիքները կստանան միանվագ 10 միլիոն դրամ և ամսական 300 հազար դրամ։
«Զոհվածների եւ 1-ին խմբի հաշմանդամություն ստացած զինծառայողների ընտանիքները միանվագ կստանան 10 մլն դրամ, 2-րդ խմբի հաշմանդամները՝ 5 մլն, իսկ հետագայում՝ 20 տարվա ընթացքում, կստանան ամսական 300 հազար դրամ: Սպաների համար այդ գումարը կկազմի ամսական 300 հազար դրամ, ենթասպաների համար՝ 250 հազար դրամ, շարքայինների համար՝ 100 հազար դրամ: Այսինքն, սպային կամ նրա ընտանիքին 20 տարի շարունակ կհատկացվի 82 մլն դրամ, ենթասպաներին՝ 70 մլն, շարքայիններին՝ 58 մլն»,-ասաց Սարգսյանը։
Դրամական միջոցները կստանան զինծառայողների ծնողներն ու երեխաները, ինչպես նաև մինչև 23 տարեկան եղբայրներն ու քույրերը։
Նախարարը, հաշվի առնելով, որ 2017 թվականին նախատեսվում է «կոշտ բյուջե», ուստի նշեց, որ բյուջետային միջոցներից փոխհատուցում չի տրվի։ Կհավաքվեն պետության և հասարակության միջոցները մեկ ընդհանուր ֆոնդում։
Յուրաքանչյուր աշխատող քաղաքացի ֆոնդին ամսական հազար դրամ կվճարի: Ֆոնդը կառավարելու են կառավարությունը, ԿԲ-ն եւ հոգաբարձուների խորհուրդը:
