ԵՐԵՎԱՆ, 11 նոյեմբերի — Sputnik. Թբիլիսի քաղաքի №56 մանկապարտեզում զանգվածային «հարսանիք» է կազմակերպվել, ինչի հետևանքով դժգոհություն են հայտնել համացանցից օգտվող վրացիներն ու Վրաստանի Ազգային պաշտպանը։ Sputnik Գրուզիան հայտնում է, որ պաշտպանը անհապաղ արձագանք է պահանջել համապատասխան գերատեսչությունից։
«Պալիտրա» հեռուստաալիքը տարածել է մի տեսանյութ, որում 4-5 տարեկան երեխաները զանգվածային հարսանիքի բեմականացման են մասնակցում։ Տեսանյութում երևում է, թե ինչպես է քողով աղջիկը մոտենում տղային, նրանք մատանիներ են փոխանակում, իսկ մյուս երեխաներն իրենց «հերթին» են սպասում։
Ավելի ուշ մանկապարտեզի սաներից մեկի ազգականի մեկնաբանությամբ տեսանյութը հայտնվել է Facebook սոցիալական ցանցում։ Տեսածից վրդովված օգտատերերը «հարսանիքը» այլանդակություն և սադիզմ են անվանել։
«Դաստիարակչական գործընթացն այդպես անցկացնելը հակասում է երեխայի շահերին և վատ ազդեցություն ունենում նրա ընկալման ձևավորման վրա… Վրաստանի Ազգային պաշտպանը կոչ է անում Թբիլիսիի մանկապարտեզների կառավարման գործակալությանն անհապաղ արձագանքել այդ միջադեպին», — ասվում է Վրաստանի Ազգային պաշտպանի կայքում տեղադրված հայտարարությունում։
Օմբուդսմենը կոչ է արել մանկապարտեզներին առաջնորդվել նախադպրոցական կրթության չափանիշներով, որպեսզի դաստիարակչական գործընթացն իրականացվի երեխաների տարիքին և զարգացմանը համապատասխան։ Մանկապարտեզների կառավարման գործակալությունում խոստացել են նկատողություն անել դաստիարակչուհուն։
