ԵՐԵՎԱՆ, 11 նոյեմբերի — Sputnik. Միացյալ Նահանգները վերահաստատում է վճռական աջակցությունը ԵԱՀԿ ՄԽ համանախագահներին, այդ մասին հայտարարել է ԵԱՀԿ-ում ԱՄՆ դեսպան Դանիել Բայերը Վիեննայում Մշտական խորհրդին ուղղված ուղերձում:
Նրա խոսքով` ԱՄՆ-ն բարձր է գնահատում ԵԱՀԿ ՄԽ համանախագահների փոխգործակցությունը կողմերի հետ՝ Լեռնային Ղարաբաղի հակամարտության խաղաղ կարգավորմանը նպաստելու նպատակով:
«Միացյալ Նահանգները մտահոգված էր ապրիլին շփման գծի երկայնքով բռնության սրման առնչությամբ, ինչպես նաև՝ վայրագությունների մասին հայտարարություններով»,- ասել է նա։
Բայերը նշել է, որ ԵԱՀԿ ՄԽ համանախագահ երկիր ԱՄՆ-ն շտապ քայլեր է ձեռնարկել լարվածությունը նվազեցնելու համար: ԱՄՆ պետքարտուղար Ջոն Քերին հանդես է եկել մայիսի 16-ին Վիեննայում 3 + 2 ձևաչափով հանդիպում կազմակերպելու նախաձեռնությամբ։
Դեսպանը կոչ է արել կողմերին` աջակցել ԵԱՀԿ գործող նախագահի անձնական ներկայացուցչի մանդատի ընդլայնմանը, ինչպես համաձայնեցվել է Վիեննայում և Սանկտ Պետերբուրգում հանդիպումների ժամանակ: Նա հույս է հայտնել, որ այս ընդլայնումն ի վերջո կարող է արտահայտվել 2017 թվականի համար ԵԱՀԿ բյուջեում: Դեսպանը նաև կոչ է արել կողմերին` աշխատել հետաքննությունների մեխանիզմի ստեղծման առաջարկի ուղղությամբ:
«Միացյալ Նահանգներն աջակցում է վստահության ամրապնդման և հայերի ու ադրբեջանցիների միջև երկխոսության ընդլայնման քայլերին, ինչը կարող է օգնել կայունացնել անվտանգության հետ կապված իրավիճակը և ստեղծել բանակցությունների համար ավելի կառուցողական մթնոլորտ: Միացյալ Նահանգները բարձր է գնահատում Գերմանիայի նախագահության և ԵԱՀԿ գործող նախագահի անձնական ներկայացուցիչ Անջեյ Կասպրշիկի սերտ համագործակցությունը՝ համանախագահների միջնորդական ջանքերին և տեղում իրավիճակի կայունացմանն աջակցելու գործում»,- ասել է Բայերը:
Նա նշել է, որ ԱՄՆ-ն կիսում է կողմերի հիասթափությունը հակամարտության չափազանց երկար ձգվելուց: Ըստ նրա` հակամարտությունը չունի ռազմական լուծում: Որպես ԵԱՀԿ Մինսկի խմբի համանախագահ՝ Միացյալ Նահանգները շարունակում է հանձնառու մնալ կողմերի հետ աշխատելուն՝ հակամարտության ամուր և խաղաղ կարգավորման հասնելու համար։
ԱՄՆ դեսպանը նաև միացել է ԵԱՀԿ նախկին ֆրանսիացի համանախագահ Պիեր Անդրիոյին ուղղված բարեմաղթանքներին և ողջունել նոր դեսպան Ստեֆան Վիսկոնտիին:
