ԵՐԵՎԱՆ, 11 նոյեմբերի — Sputnik. Արարատի մարզի Այգեստան գյուղում տիրող լարված իրավիճակը, գյուղապետ Սոկրատ Հովսեփյանի համոզմամբ, հրահրել է անցած ՏԻՄ ընտրություններում իր մրցակից համագյուղացի Հակոբ Հասրաթյանը:
«Պարտված թեկնածուն ասում էր՝ ձեր հարկերը մի մուծեք, ես կգամ «կջրեմ» ձեր հարկերը»,- ասում է Սոկրատ Հովսեփյանը՝ հավելելով, որ Հասրաթյանների ազգը գյուղում մեծ է՝ ի տարբերություն իրենց, և հնարավորություն ունի ազդելու գյուղացիների վրա:
Ի տաբերություն չվճարված հարկերը մարելու՝ հակառակորդի խոստմանը, Սոկրատ Հովսեփյանը գյուղապետի պաշտոնում երրորդ անգամ վերընտրվելուց հետո իր առջև նպատակ է դրել հավաքել կուտակված հարկերը և արդեն դիմել է նաև դատարան:
«75 մարդու գործ արդեն տվել են դատարան: 75-ի հարկային պարտավորությունը կազմում է 3.5 մլն դրամ: 100 գործ արդեն պատրաստ է, որ նորից ուղարկեմ դատարան: Դա էլ շուրջ 5 մլն-ի հարկային պարտավորություն է»,- ասում է գյուղապետն ու նշում, որ իր դեմ բողոքողները հենց այդ համագյուաղցիներն են, որոնց ինքը որոշել է պարտավորեցնել մարել հարկերը:
Գյուղացիները 4-6 տարվա պարտք են կուտակել՝ հողի, գույքի, ջրի դիմաց չվճարած հարկերի տեսքով:
«Ես չեմ վախենում հարկերն այդ մեթոդով հավաքելուց, թեկուզ 10 հազար թշնամի վաստակեմ»,- ասում է գյուղապետը՝ հավելելով, որ դա է ի պաշտոնե իր պարտականությունը:
Ինչ վերաբերում է հրաժարականի պահանջին, Սոկրատ Հովսեփյանը հիշեցրեց, որ ինքը պարտավորույուններ ունի իրեն ձայն տված 500 ընտրողի առաջ և հրաժարական կտա միայն նրանց պահանջով:
Սոկրատ Հովսեփյանն Այգեստանի գյուղապետի պաշտոնը զբաղեցնում է 2008 թ.-ից և այդ ընթացքում 3 անգամ վերընտրվել: Ինչպես ինքն է ասում՝ հոգով կոմունիստ է, վերջերս դարձել է ՀՀԿ-ական, մինչև թոշակի անցնելը աշխատել է որպես դատախազ:
