ԵՐԵՎԱՆ, 10 նոյեմբերի-Sputnik. Արդարադատության նախարար Արփինե Հովհաննիսյանը կարծում է, որ ծննդի և մահվան մասին բժշկական վկայականներ ստանալու գործառույթները պարզեցնելը հնարավորություն կտա վերացնել վկայականները ՔԿԱԳ մարմիններ ներկայացնելու պահանջը։
«Բժշկական հաստատություններում պետք է ներդնել ծննդի և մահվան բժշկական վկայականների պատրաստման էլեկտրոնային միասնական համակարգ, ինչը թույլ կտա ավտոմատացնել և միասնականացնել բժշկական անձնակազմի գործառույթները և կրճատել այդ գործառույթների կատարման ժամկետները»,-ասաց նախարարը։
Ըստ այդմ, ՔԿԱԳ մարմինները հնարավորություն կունենան ծնունդ կամ մահ գրանցելու նպատակով ներբեռնել ծննդի և մահվան մասին բժշկական վկայականները և շրջանցել մի շարք «անհարկի գործառույթներ»։
Ըստ նախարարի` կկրճատվեն բժշկական վկայականների տրամադրման հետ կապված մի շարք գործառույթներ, կբացառվի ծննդյան կամ մահվան գրանցումներ կատարելիս անձանց վերաբերող տվյալների թերությունների, վրիպակների կատարման ռիսկը, տվյալների հակասությունը։
«Ներկայացվող նախագծի համաձայն կբարելավվի բժշկական վիճակագրությունը, կբացառվի ծնված և գրանցված երեխաների, ինչպես նաև բժշկական հաստատություններում գրանցված մահերի և ՔԿԱԳ մարմիններում գրանցված մահերի միջև վիճակագրական տարբերությունները, հնարավորություն կընձեռվի երեխայի ծննդյան կամ անձի մահի՝ ՔԿԱԳ մարմիններում չգրանցելու դեպքում համապատասխան միջոցներ ձեռնարկել, ռեալ ժամանակում ծնունդների և մահերի, մահվան բժշկական պատճառների վերաբերյալ կտրվի անհրաժեշտ տեղեկատվություն»,-ասաց նախարարը։
Նախարարն ասաց, որ համակարգն արդեն իսկ փորձնական տեղադրվել է Երևանի, Շիրակի, Տավուշի, Լոռու մարզերի բժշկական հաստատություններում։ Նախատեսվում է համակարգն ամբողջությամբ տեղադրել բժշկական հաստատություններում `գործարկելով 2017թ. հունվարի 1-ից:
