ԵՐԵՎԱՆ, 10 նոյեմբերի — Sputnik. Հայաստանը և Ռուսաստանը ոլորտի զարգացման մեծ ներուժ ունեն, Հայաստանի ԱԺ-ի և ՌԴ Դաշնային ժողովի միջև համագործակցության միջխորհրդարանական հանձնաժողովի նիստից հետո տեղի ունեցած ճեպազրույցի ժամանակ ասաց ԱԺ փոխխոսնակ Հերմինե Նաղդալյանը։
«Մենք մեծ տնտեսական հնարավորություններ և լուրջ ներուժ ունենք։ Հայաստանի կառավարությունը, այդ ոլորտը որպես առաջնահերթություն դիտարկելով, առանձին պետական կոմիտե է ստեղծել։ Որքան էլ ոլորտում առկա աճը մեծ լինի, մենք պետք է ընդլայնենք ինչպես զբոսաշրջային ուղղությունների քանակը, այնպես էլ այցերի ծավալը», — ասաց Նաղդալյանը։
Նրա խոսքով` նման քայլերը կարող են լուրջ ներդրում ունենալ Հայաստանի տնտեսական զարգացման մեջ։ Ռուսաստանի դաշնային խորհրդի անդամ Նիկոլայ Ռիժկովն իր հերթին նշեց, որ հանձնաժողովի ուշադրության կենտրոնում այս անգամ մշակույթի և զբոսաշրջության հարցերն են եղել։
«18 տարվա ընթացքում առաջին անգամ մենք անդրադարձանք այս թեմային։ Մենք առաջին քայլերն արեցինք, չի կարելի ասել, թե ամեն ինչ նիստից հետո այլ կերպ կընթանա, սակայն հիմքերը մենք դրել ենք։ Հուսով եմ, որ մի քանի տարի հետո արդյունքները կտեսնենք», — ասաց Ռիժկովը։
Հանձնաժողովի հաջորդ նիստը կանցկացվի հաջորդ տարվա հունիսին Խանտի Մանսիյսկում։
Ազգային վիճակագրական տվյալների համաձայն` 2016 թվականի հունվարից սեպտեմբեր Հայաստան է այցելել մոտ 970 հազար զբոսաշրջիկ։ 2015 թվականի նույն ժամանակահատվածի համեմատ այդ ցուցանիշն աճել է 3,6%-ով։ Ընթացիկ տարվա հունվարից սեպտեմբեր զբոսաշրջության նպատակով երկրից մեկնել է շուրջ 900 հազար մարդ։ 2015 թվականի նույն ժամանակահատվածի համեմատ այդ ցուցանիշն աճել է 3%-ով։ Հայաստան հիմնականում այցելում են զբոսաշրջիկներ Ռուսաստանից։ Նաև մեծ թվով զբոսաշրջիկներ են գալիս Եվրոպական երկրներից, Իրանից, Վրաստանից և ԱՄՆ-ից։
