ԵՐԵՎԱՆ, 10 նոյեմբերի — Sputnik, Արմենուհի Մխոյան. Արդեն երկրորդ անգամ Գյումրու նորընտիր ավագանու նիստն անցնում է միայն «Բալասանյան» դաշինքի անդամների ներկայությամբ:
Ինչպես Գյումրու նորընտիր ավագանու անդրանիկ՝ հոկտեմբերի 10-ի նիստին, այնպես էլ այս անգամ նիստից բացակայում էին քաղաքական 3 ուժեր` «ԳԱԼԱ»-ն, ԲՀԿ-ն և «Հայկական վերածնունդը», սակայն դա չխանգարեց, որ քվորում ապահովվի և քննարկման դրվի օրակարգային 46 հարց։ Ավագանու 33 անդամից 17-ի ներկայությունը թույլ է տալիս ավագանու նիստերը կայացած համարել` չնայած մյուս ուժերի բոյկոտին:
Մինչ ավագանու նիստի մեկնարկը Սամվել Բալասանյանը հայտարարեց, որ դիմել են Կենտրոնական ընտրական հանձնաժողով՝ ճշտելու` արդյո՞ք ճիշտ է «Հրապարակ» թերթում օրերս տեղ գտած «Հայկական Վերածնունդ» կուսակցության ներկայացուցիչ Հովհաննես Մարգարյանի այն հայտարարությունը, որ այդ կուսակցությունից ավագանու անդամները վայր են դրել իրենց մանդատները:
Ամեն դեպքում, արդեն երկրորդ անգամ ավագանու նիստերին հարցերը դրվում են քվեարկության ու ընդունվում միաձայն: Այս նիստին չեղյալ համարվեց ավագանու նախկին՝ 2012 թվականի որոշումը, և ընդունվեց նոր կանոնակարգ, որով ավագանին կառաջնորդվի առաջիկա 5 տարիներին:
Ավագանին ընտրեց Ֆինանսավարկային և տնտեսական հարցերի, Քաղաքաշինության և հողօգտագործման, Մշակույթի, կրթության, սպորտի և սոցիալական, ինչպես նաև Իրավական հարցերի մշտական հանձնաժողովների նախագահներին. մշտական 4 հանձնաժողովներից 3-ի նախագահները հենց «Բալասանյան» դաշինքից են: Ինչպես նշեց Սամվել Բալասանյանը, դա որոշվել է հատուկ բանաձևով՝ հիմք ընդունելով Ընտրական օրենսգիրքը: Միայն մեկ հանձնաժողով կգլխավորի ԲՀԿ ներկայացուցիչը, սակայն տեղակալը կրկին «Բալասանյան» դաշինքի ներկայացուցիչն է:
Ավագանու Մշակույթի, կրթության, սպորտի և սոցիալական հարցերի մշտական հանձնաժողովի նախագահ ընտրվեց Մխիթար Սահակյանը, ով, շատ գյումրեցիների կարծիքով, «մշակույթից կիլոմետրերով հեռու կանգնած» անձնավորություն է:
Քաղաքաշինության և հողօգտագործման հարցերի մշտական հանձնաժողովի նախագահ ընտրվեց «Մերձմոսկովյան» ԲԲԸ-ի փոխտնօրեն, անկուսակցական Արտակ Ադամյանը: Իսկ Ֆինանսավարկային և տնտեսական հարցերի մշտական հանձնաժողովի նախագահն է «Գյումրի-գարեջուր» ՍՊԸ-ի արտաքին կապերի վարչության պետ, անկուսակցական Լուսինե Սանոյանը, ով Սամվել Բալասանյանի քրոջ դուստրն է, համայնքի ղեկավարի տեղակալ Ռուբեն Սանոյանի դուստրը:
Գյումրու ավագանու անդամները միաձայն, առանց «խղճի խայթի» կողմ քվեարկեցին նաև քաղաքապետարանում հաստիքային կրճատումներին. Գյումրու քաղաքապետարանում կկրճատվի 38 հաստիք` 2 հայեցողական պաշտոն, 17 համայնքային ծառայողի, 19 հաստիք` տեխսպասարկման անձնակազմից։ Կրճատման արդյունքում քաղաքապետարանը կխնայի 28 մլն 35 հազար դրամ:
Ավագանին այս նիստին հաստատեց նաև համայնքի ղեկավարի դրույքաչափը, որը հաշվարկային գումարով կազմում է 300 հազար դրամ՝ ԱԺ պատգամավորի աշխատավարձի 90 տոկոսի չափով: Սակայն Սամվել Բալասանյանը նշեց, որ աշխատավարձ չի ստանալու, այն կփոխանցի «Գյումրին առանց տնակների հիմնադրամին»:
Ավագան քննարկեց նաև տարբեր կազմակերպությունների, կառույցների ու անհատ քաղաքացիների համայնքային բյուջեից դրամական աջակցություն ցուցաբերելու հարցերը, որոնք նույնպես միայն կողմ քվեարկությամբ ընդունվեցին:
