ԵՐԵՎԱՆ, 10 նոյեմբերի — Sputnik, Խաչիկ Չախոյան. Երևանում նոյեմբերի 10-ին մեկնարկեց մինչև 19 տարեկան ֆուտբոլիստների Եվրոպայի 2017 թվականի առաջնության խմբային ընտրական փուլը: Հայաստանի հավաքականն առաջին խաղում մրցեց Շվեյցարիայի հետ:
Առաջին խաղում երիտասարդ հայ ֆուտբոլիստները խոշոր հաշվով պարտություն կրեցին` չորս անպատասխան գնդակ ընդունելով սեփական դարպասը:
Շվեյցարիայի թիմի հետ խաղում անզեն աչքով նկատելի էր, որ Հայաստանի հավաքականը խաղում է հինգ պաշտպանով` հիմնական շեշտը դնելով հակագրոհների վրա: Ու, ճիշտն ասած, եթե մեր ֆուտբոլիստների կատարողական վարպետությունը մի փոքր ավելի բարձր լիներ, այդ մարտավարությունը կարող էր և պտուղներ տալ: Բայց հայ ֆուտբոլիստները մինչև ընդմիջում չիրացրին երեք ռեալ գոլային պահ: Փոխարենը շվեյցարացիները, յուրաքանչյուր խաղակեսում երկուական գնդակ խփելով, հաղթանակի հասան խոշոր հաշվով ու շատ լուրջ քայլ կատարեցին խմբից դուրս գալու համար:
Խմբային փուլում Հայաստանի հավաքականի համար հաջորդ հանդիպումը դառնում է պարզապես վճռական: Եթե մեր թիմը ևս մեկ պարտություն կրի, ապա արդեն տեսականորեն կզրկվի պայքարը հաջորդ փուլում շարունակելու հնարավորությունից: Իսկ հաջորդ խաղում մեր հավաքականի մրցակիցը Իտալիայի մինչև 19 տարեկանների հավաքականն է, որ դժվարին պայքարում կարողացավ առաջին խաղում հաղթանակի հասնել Հունգարիայի նկատմամբ: Իտալիայի հավաքականի առաջատարը «Միլանի» կիսապաշտպան Մանուել Լոկատելին է, և առանց վարանելու կարելի է ասել, որ մերոնց նոր փորձություն է սպասում հաջորդ խաղում:
Շվեյցարիայի հավաքականի հետ խաղից հետո Հայաստանի թիմի գլխավոր մարզիչ Արամ Ոսկանյանը նշեց, որ անհատական որակներով հայ ֆուտբոլիստները զիջում են մրցակիցներին: Հետևաբար, պետք է խաղը կառուցել հակագրոհների վրա: Դժվար է հավատալ, որ Իտալիայի հետ խաղում էլ հայ ֆուտբոլիստները կկարողանան այլ մարտավարություն ընտրել: Չնայած նման դեպքերում կարևորը արդյունքն է, ու գուցե երկրորդ խաղից հետո արդյունքը մեզ բավարարի, թեկուզ և խաղի վատ մակարդակ արձանագրվի:
