ԵՐԵՎԱՆ, 29 հոկտեմբերի-Sputnik. Վանաձորցիներն ուզում են վերականգնել ֆուտբոլային ավանդույթները: Եթե նախկինում նրանք հաջողակ էին ֆուտբոլում, ապա տարիների ընթացքում հնացած մարզադաշտը, անմխիթար պայմաններում մարզվելը ստիպել էր նահանջել:
![Футбольная академия Ванадзора Футбольная академия Ванадзора - Sputnik Արմենիա](https://cdn.am.sputniknews.ru/img/531/18/5311880_0:0:1600:1200_600x0_80_0_0_7ce8ddc4622b9b55ab0ed6ce41c31fd6.jpg)
Այսօր Վանաձորում շահագործման հանձնվեց ֆուտբոլի ակադեմիան: Մտնում ես ընդարձակ խաղադաշտ և առաջին հերթին տպավորվում երեխաների փայլուն աչքերով ու եռանդուն մարզումներով: Տվել են հնարավորություն, միջազգային չափորոշիչներին համապատասխան խաղադաշտ, նրանք էլ խոստանում են հաջողակ դառնալ ֆուտբոլում:
«Ես բարձրացնելու եմ հայ ֆուտբոլիստի անունը: Դառնալու եմ լավ ֆուտբոլիստ՝ ՀենրիխՄխիթարյանի նման»,-ասաց մարզվողներից մեկը:
Մեծ էր ոգևորությունը նաև մարզիչների շրջանում:
«Մեր երազանքն էր, որ իրականացվեց: Վանաձորցիներն ուրախության մեջ են։ Վանաձորցին՝ լոռեցին, ֆուտբոլ շատ է սիրում: 350 երեխա այսօր արդեն անդամագրված են և ուզում են մարզվել: Տա Աստված՝ սա լինի հիմք, որ վաղն ունենաք քաղաքային գեղեցիկ մարզադաշտ»,-ասաց Սամվել Սաֆարյանը:
![Футбольная академия Ванадзора Футбольная академия Ванадзора - Sputnik Արմենիա](https://cdn.am.sputniknews.ru/img/531/18/5311824_0:0:1600:1200_600x0_80_0_0_009ab56124576845220361df7aca1f8b.jpg)
Վանաձորի ֆուտբոլի ակադեմիայի ուսումնական մասի վարիչ Արմեն Փիրումյանն էլ շեշտեց՝ ոչ պաշտոնապես ակադեմիան բացվել է սեպտեմբերի 15-ին ու արդեն ունեն մարզվող 150 երեխա: Կարող են մինչև 500 երեխայի միաժամանակ մարզել:
«Հիմա մարզիչների աշխատանքն էլ է փոխվել, ավելի եռանդով են աշխատում: Ասել եմ, որ մենք ունեցել ենք լավ տղաներ, իսկ գրավականը մեր հիասքանչ սարերն ու ձորերը, թարմ օդն են»,-ասաց նա:
Սա համատեղ ներդրումային ծրագիր է: Արժեքը շուրջ 1,133 միլիարդ դրամ է, որից 982,17 միլիոն դրամը տրամադրել է Հայաստանի ֆուտբոլի ֆեդերացիան, իսկ 150,83 միլիոն դրամը՝ ՈՒԵՖԱ-ն:
![Футбольная академия Ванадзора. Армен Пирумян Футбольная академия Ванадзора. Армен Пирумян - Sputnik Արմենիա](https://cdn.am.sputniknews.ru/img/531/20/5312010_0:0:1600:1200_600x0_80_0_0_5df9fb785433425e279c62e4accce955.jpg)
Վանաձորի ֆուտբոլի ակադեմիայի եռահարկ մասնաշենքն ունի կահավորված մարզչական սենյակներ, հանդերձարաններ, սանհանգույցներ, ցնցուղարաններ, դասասենյակ-լսարան, բժշկական սենյակ և այլն:
Այստեղ աշխատանքով ապահովված կլինի 35-40 մարդ՝ 130-150 դրամ միջին աշխատավարձով: Այսօր նախագահ Սերժ Սարգսյանը Վանաձորում իր աշխատանքային այցի շրջանակում եղել է նաև ֆուտբոլի ակադեմիայում