ԵՐԵՎԱՆ, 9 նոյեմբերի — Spurnik. Հայաստանում Լեհաստանի արտակարգ և լիազոր դեսպան Եժի Մարեկ Նովակովսկին Sputnik Արմենիայի թղթակցի հետ զրույցում ասաց, որ Լեհաստանի ավագ սերունդը հայկական կոնյակի համը հիշում է դեռ կոմունիզմի շրջանից, բայց այսօրվա լեհ գնորդների մեծ մասն ընդհանրապես չգիտի «Արարատ» ապրանքանիշի մասին։
«Լեհաստանում Հայաստանի մասին գիտեն, որ քրիստոնեական երկիր է. հայերն ապրել և ապրում են մեր երկրում։ Դրանից պետք է օգտվել, խորացնել և զարգացնել հարաբերությունները»,- ասաց դեսպանը։
Ցավոք, նրա խոսքով` Լեհաստանի շուկայում հայկական քիչ ապրանքներ են ներկայացված։
«Շուկայում շատ քիչ են հայկական մրգերը։ Կոնյակ էլ է բերվում, բայց ոչ լավ որակի, քանի որ ներկրվում է Ֆրանսիայի տարածքով», — ասաց Նովակովսկին։
Դեսպանի խոսքով` Made in Armenia պիտակով ապրանքներն այդքան էլ տարածված չեն Լեհաստանում։ Գովազդը թանկ է, այդ պատճառով շատ գործարարներ չեն կարողանում ներկայացնել իրենց ապրանքը (Լեհաստանում հեռուստատեսային գովազդը գրեթե 30 անգամ ավելի թանկ է, քան Հայաստանում)։
Չնայած առկա խնդիրներին` դեսպանը խորհուրդ է տալիս աշխատել հայկական ապրանքանիշների դիրքերի ամրապնդման ուղղությամբ։ Նա համոզված է, որ երկու երկրները տնտեսական տեսանկյունից դեռ չեն օգտագործել բոլոր հնարավորությունները։
Այնուհանդերձ, նրա կարծիքով, հայ-լեհական հարաբերություններին փայլուն ապագա է սպասվում։ Նա նշեց, որ նոյեմբերի 11-ին Երևանում, Արամ Խաչատրյանի անվան համերգասրահում տեղի կունենա «Կրակովյան կապելլա» անվանումով տոնական համերգ` նվիրված Լեհաստանի Անկախության օրվան։ Երկու երկրների միջև երկխոսության հաստատմանը նպաստում են նաև լրագրողների փոխադարձ այցերը։
