ԵՐԵՎԱՆ, 9 նոյեմբերի — Sputnik. Գնահատելով ԱՄՆ-ի նոր նախագահի ընտրության հեռանկարները հայ համայնքի և Հայաստանի համար` ռուս քաղաքագետ Անդրանիկ Միհրանյանը նշեց, որ իր ուշադրությունն ամենից առաջ գրավել է Թրամփի` Բաքվում նախատեսված շինարարական պայմանագրերի մասին տեղեկությունը, ինչը չի կարելի անտեսել։
Նա կարծում է, որ ԱՄՆ նոր նախագահը լուրջ ուշադրություն չի դարձնի Հարավային Կովկասին, և առաջիկայում չարժի ակտիվություն սպասել Վաշինգտոնից։
Ըստ նրա` Թրամփը բազմիցս նշել է, որ ԱՄՆ-ն պետք է վերանայի իր դաշնակիցների հետ հարաբերությունները (նույնիսկ ՆԱՏՕ-ում) և կենտրոնանա ներքին խնդիրների լուծման վրա։
«Լինելով գործնական մարդ` նա հասկանում է, որ Թուրքիայի դերն ու նշանակությունը տվյալ փուլում արդեն այն չէ, ինչ խորհրդային շրջանում»,- ասաց Միհրանյանը Sputnik Արմենիային տված հարցազրույցում։
Խոսելով Հիլարի Քլինթոնի մասին` նա նշեց, որ Հայաստանի արտգործնախարարի և նրա միջև լավ հարաբերություններ են հաստատվել, նա եղել է Հայաստանում։
«Դեմոկրատները կարող էին մեծ հետաքրքրություն ունենալ տարածաշրջանի նկատմամբ։ Քլինթոնը պետքարտուղարի պաշտոնում ներգրավված էր հայ-թուրքական արձանագրությունների և ղարաբաղյան կարգավորման հարցերի մեջ», — նշեց Միհրանյանը։
Քաղաքագետը կարծում է, որ ամերիկյան վարչակազմը, անկասկած, չի ցանկանում, որ Հայաստանի և Ադրբեջանի միջև լայնածավալ պատերազմի վերսկսվի։ Միաժամանակ Սպիտակ տունը ղարաբաղյան հակամարտության կարգավորման չի ձգտի։
«Դա այն խնդիրը չէ, որը կախված է նախագահից։ Առավել ևս այնպիսի նախագահից, որը փորձ չունի արտաքին քաղաքականության ոլորտում։ Իմ կարծիքով` նրա համար այդ խնդիրները երկրորդական են»,- ասաց Միհրանյանը։
Նրա կարծիքով` բացառված չէ, որ 2017թ-ի ապրիլի 24-ի իր ուղերձում Դոնալդ Թրամփը կարտասանի «ցեղասպանություն» եզրույթը։
«Նա անկանխատեսելի մարդ է և կարող է ասել` թքած, թե Թուրքիան կնեղանա»,- ասաց Միհրանյանը։
Քաղաքագետը կարծում է, որ ԱՄՆ նոր նախագահը, լինելով կարծրատիպերը կոտրող մարդ, շատ բան է ցանկանում վերանայել, և հնարավոր է, այդ դիրքորոշումը հանգեցնի ԱՄՆ-ի կողմից Հայոց ցեղասպանության ճանաչմանը։
