ԵՐԵՎԱՆ, 9 նոյեմբերի — Sputnik. Հայաստանում ԱՄՆ դեսպան Ռիչարդ Միլզը կարծում է, որ ով էլ լինի ԱՄՆ նախագահը, միևնույն է` Հայաստանն ԱՄՆ-ի գործընկերը կմնա։ Այս մասին նա հայտարարել է ԱՄՆ դեսպանատանը։
«ԱՄՆ-ն կշարունակի իրական բարեկամ և գործընկեր մնալ։ Իհարկե, մենք կհետևենք բարեկամ Հայաստանի առջև ստանձնած մեր պարտավորություններին», — ասաց դեսպանը։
Նրա խոսքով` ԱՄՆ-ն հետագայում էլ կաշխատի Հայաստանի հետ`շարունակելով մնալ նրա մշտական և հուսալի գործընկերը։
«Մենք կշարունակենք միասին կառուցել բարեկեցիկ ապագա, որին արժանի է հայ ժողովուրդը», — ասաց նա։
ԱՄՆ նախագահի ընտրությունն անցկացվել է 2016 թվականի նոյեմբերի 8-ին։ Նախնական տվյալով` հաղթել է հանրապետական Դոնալդ Թրամփը։ Դեմոկրատական կուսակցության թեկնածու Հիլարի Քլինթոնը զանգահարել է Թրամփին և ընդունել իր պարտությունը։
