ԵՐԵՎԱՆ, 5 նոյեմբերի — Sputnik. Շենգավիթ վարչական շրջանի ընդհանուր իրավասության դատարանը շուրջ կես տարի տևած դատավարությունից հետո մերժեց «ԱՐ» հեռուստաընկերության բազմամյա աշխատակից Նունե Սիմոնյանի հայցն ընդդեմ հեռուստաընկերության ղեկավարության:
Լրագրողը դատարանից պահանջում էր չեղարկել իր հետ աշխատանքային պայմանագիրը լուծելու մասին «Ար» հեռուստաընկերության տնօրինության որոշումը և հեռուսաընկերությանը պարտավորեցնել փոխհատուցում վճարել իրեն` անցած ամիսների հարկադիր պարապուրդի դիմաց: Բայց հունիսին մեկնարկած դատավարությունն ավարտվեց հայցի մերժումով:
Հիշեցնենք` դատավարության ընթացքում հեռուստաընկերության ներկայացրած փաստական հանգամանքների համաձայն, Նունե Սիմոնյանն, աշխատելով «ԱՐ» հեռուստաընկերության «Ազդարար» լրատվական ծրագրում, 2016թ-ի փետրվարի 18-ին և 19-ին 2 նկատողություն է ստացել, որից հետո` փետրվարի 19-ին, ազատվել է աշխատանքից:
Մինչդեռ Նունե Սիմոնյանի փաստաբան Էռնեստ Աբելյանը հեռուստաընկերության ներկայացուցչից դատարանում պահանջել էր ներկայացնել օրենքի պարտադիր պահանջ հանդիսացող երրորդ կարգապահական տույժի կիրառման մասին ապացույցներ, քանի որ ՀՀ Աշխատանքային օրենսգրքի համաձայն՝ անձի հետ կնքված աշխատանքային պայմանագիրը կարող է լուծվել, եթե տվյալ աշխատակիցը երկու անգամ կարգապահական տույժի է ենթարկվում, և այդ կարգապահական տույժերը դեռ չմարված, ստանում է երրորդ կարգապահական տույժը:
Բացի այդ, լրագրողի շահերը պաշտպանող փաստաբանի պնդմամբ, երկու կարգապահական տույժերը ևս ներկայացվել են սահմանված կարգի խախտմամբ, քանի որ Նունե Սիմոնյանից կատարած խախտման համար բացատրություն չի պահանջվել, նրան այդ պահանջով գրություն չի ներկայացվել:
Փաստաբանը դժվարացավ ասել՝ առաջին ատյանի դատարանի վճիռը կբողոքարկվի վերաքննիչ դատարանում, թե ոչ: Նա նշեց, որ այդ հարցը պետք է քննարկի իր վստահորդի հետ:
Հայաստանում աշխատանքը կորցնելուց հետո Նունե Սիմոնյանը ստիպված է եղել մեկնել ԱՄՆ` ընտանիքի ապրուստը հոգալու և կենցաղային խնդիրները լուծելու համար:
