ԵՐԵՎԱՆ, 4 նոյեմբերի — Sputnik, Լաուրա Սարգսյան, Արմենուհի Մխոյան. Կազբեկ Կուդզաևին ոգևորել է այն հանգամանքը, որ Sputnik Արմենիայի հոդվածից հետո գտնվել է այն աղջնակը, որին փնտրել է տարիներ շարունակ։
«Փնտրում եմ բոլոր նրանց, որոնց վիրահատել եմ, բոլոր այն բժիշկներին, որոնց հետ աշխատել եմ Հայաստանում։ Խնդրում եմ` թող արձագանքեն նրանք, ովքեր հիշում են այս պատմությունն ու այդ տարիների իրադարձությունները», — Sputnik Արմենիայի թղթակցի հետ զրույցում ասաց Կուդզաևը։
Նրա խոսքով` իր համար մեծ անակնկալ է եղել, երբ իր փոքրիկ հիվանդին տեսել է արդեն հասուն տարիքում, քանի որ նրա հիշողության մեջ դեռ վառ է մնացել երեք տարեկան գեղեցիկ աղջկա կերպարը։ Բժշկի խոսքով` ինքն ու իր երբեմնի հիվանդը հիմա միասին անակնալ են պատրաստում։
«Կարծում էի, որ ինձ արդեն մոռացել են։ Նման արձագանքի չէի սպասում։ Իսկ նա ասաց, որ ինքն էլ ինձ է փնտրել, խոստովանեց, որ դժվարությամբ է հավատում ինձ գտնելու փաստին», — ասաց Կուդզաևը։
Աղջիկը բժշկի ամենափոքր հիվանդն է եղել։ Վիրահատությունից հետո ամեն օր այցելել է նրան, աղջիկն ամուր գրկել բժիշկին, որ հանկարծ չլքի իրեն։
Կուդզաևը հիշում է բոլոր հիվանդներին, բայց միայն մեկի անուն-ազգանունն է մտապահել` Աիդա Սահակյան։ Այս կինը նստատեղի ութ կոտրվածք ու միզապարկի վնասվածք է ունեցել, բայց վիրահատության չորրորդ օրն արդեն ոտքի է կանգնել, իսկ մեկուկես տարի անց տղա է լույս աշխարհ բերել։
«Հուսով եմ, որ ձեր հոդվածից հետո կարձագանքեն նաև մյուս հիվանդները։ Ես կուզեի տեսնել նրանցից յուրաքանչյուրին», — նշեց Կուդզաևը։
Խոստովանեց, որ Հայաստանում ստացած փորձն իրեն շատ է օգնել հետագա գործունեության ընթացքում։ Երկու տարի առաջ եղել է Հայաստանում. գիտաժողովի է մասնակցել, ու կրկին թարմացել են 1988-ի հիշողությունները, որոնք մինչ օրս չի կարողանում մոռանալ։
Հ.Գ. Sputnik Արմենիան նույնպես շարունակում է որոնումներն ու խնդրում բոլոր նրանց, ովքեր ճանաչել են բժիշկին, զանգահարել հետևյալ հեռախոսահամարներով` + (37410) 600-130, + (37410) 600-131։
