ԵՐԵՎԱՆ, 2 նոյեմբերի — Sputnik. Ալմաթիի քրեական գործերի մասնագիտացված միջշրջանային դատարանը չորեքշաբթի մահապատժի է դատապարտել Ռուսլան Կուլեկբաևին, որը մեղադրվում է 10 մարդու սպանության և այլ հանցագործությունների մեջ։ Այս մասին հայտնում է Sputnik Ղազախստանը։
«Պատժի տեսակը` մահապատիժ», — հայտարարել է դատավորը` ընթերցելով դատավճիռը։
Դատարանը որոշել է, որ մահապատժի դատապարտված Կուլեկբաևը պարտավոր է նաև խոշոր չափի տուգանք վճարել մահացածների ազգականներին` որպես բարոյական վնասի փոխհատուցում։
Մեղադրյալի աթոռին ևս հինգ մարդ է եղել, որոնք մեղադրվել են ապօրինի զենք պահելու, կրելու, ձեռք բերելու, ինչպես նաև պատրաստելու և Կուլեկբաևի հետ համատեղ ավազակային հարձակում իրականացնելու մեջ։
Նրանք ոստիկանների վրա իրականացված հարձակման հետ որևէ կապ չեն ունեցել։ Դատարանը նրանց դեպքում պատիժ է սահմանել 3-10.5 տարվա ազատազրկումը։
Զինված տղամարդը Ալմաթիի ոստիկանների վրա հարձակում էր իրականացրել հուլիսի 18-ին։ 10 մարդ էր զոհվել, որոնցից մեկը` կին. տղամարդը նրան սպանել էր ոստիկանների վրա հարձակում իրականացնելուց մեկ օր առաջ։ Հանցագործին ձերբակալելու հատուկ գործողությունների ժամանակ ահաբեկչության վտանգի կրիտիկական մակարդակ էր սահմանվել։
Տղամարդուն նույն օրը ձերբակալել էին։ Պարզվել էր, որ նա Ղազախստանի Կիզիլորդինսկի շրջանում ծնված, նախկինում երկու անգամ դատապարտված 26-ամյա Կուլեկբաևն էր։
Ղազախստանի նախագահ Նուրսուլթան Նազարբաևը կատարվածն ահաբեկչություն էր որակել։ Ազգային անվտանգության կոմիտեն հայտարարել էր, որ ձերբակալված անձը նախկինում կապ է ունեցել սալաֆիտների հետ։ Կուլեկբաևը դատարանում ընդունել է իր մեղքը և հայտարարել, որ կատարածի համար չի զղջում։
Մեղադրյալը հայտարարել է, թե իր արածը սպանություն չէ, քանի որ զոհերը «սխալ ուղի» էին ընտրել։ Վերջին խոսքի ժամանակ էլ հայտնել է, որ իրավապահ մարմինների աշխատակիցներից վրեժխնդիր է եղել իր «մուսուլման-եղբայրներին» ճնշելու համար։
Պետական մեղադրողը դատարանին խնդրել է Կուլեկբաևին մահապատժի դատապարտել։
Ղազախստանի նախագահ Նուրսուլթան Նազարբաևը 2003 թվականին հրամանագիր է ստորագրել «Ղազախստանի հանրապետությունում մահապատիժը վերացնելու մասին»։ Հրամանագրի համաձայն` դադարեցվում է մահապատիժների կիրառումը, սակայն չի արգելվում մահապատիժ սահմանելու դատավճիռների կայացումը։
